Lionel Messi hoin final an lut

Inter Miami chuan player ṭha bik Lionel Messi an neih chinah chanchin lawmawm an nei zel, an dai phak loh tura ngaih an dai mek zel - tunah chuan Leagues Cup final hial an lut ta.

Nimin zing semifinal inkhelah Inter Miami hian Philadelphia Union chu 4-1 in an hneh. Argentina captain Messi bakah hian Josef Martinez, Jordi Alba leh David Ruiz te chuan goal khat ṭheuh an khung.

Semifinal inkhel dangah Nashville SC chuan Monterrey chu 2-0 in an hneh ve bawk. August 20, Pathianni zing dar 6:00-ah Leagues Cup final khelh a ni dawn a, tun thla tawp lam aṭangin Major League Soccer (MLS) an khel zui leh dawn a ni.

Leagues Cup final an luh avangin Inter Miami hi season thara Concacaf Champions Cup khel turin an tling nghal. Football thuneitu sang FIFA lamin kum 2025 aṭanga Club World Cup khel tur a tihpun hun atana kalkawng a ni thei dawn bawk.

Miami boss Gerardo Martino chuan, "Kan thil tum pakhat chu CONCACAF Champions Cup khelh phak a ni a, tunah chuan kan hlawhtling ta phawt. Tunah chuan Leagues Cup kan khelh laia champion hi kan tum leh ang," tiin a sawi.

Messi an neih hma khan Inter Miami hian an match hnuhnung 11-ah chak ni hmel an hmu lo. July thla aṭang khan Messi hoin an khel ṭan a, kum 36 mi ni tawh mah se Messi-a'n danglamna nasa tak a thlen, match ruk a khelhpui tawhah a team a chakpui vek.

Barcelona leh Paris Saint Germain tan pawha khel tawh Messi hian final vawi 42 a khel tling dawn ta tihna a ni a, a club thar hi a champion pui a nih chuan a khelh tawhna hmasa lama a nomawi chawi tawh nen a hlut dan a inang lo khawp ang.

Inter Miami hian Messi chauh an nei thar a ni lo. Barcelona tana a khelhpui tawh ṭhin Alba leh Sergio Busquets te an nei tel. MLS table-ah a hniam ber ni mah se, tunah chuan pathumna ni lai Philadelphia an sawp.

Martino chuan, "Leo, Josef leh Ruiz ten goal an khung a, defender Alba pawhin goal a nei. Chiang taka lang chu hun rei lote chhungin kan team hi kan danglam vek tawh, player zawng zawng an inringtawk êm êm a ni.

"Ka naute kha rawlthar thaza ang mai an ni a, a tir aṭanga a tawp thleng khan an phur êm êm vek mai a ni," tiin a sawi a, an rilru puthmang leh chet danah a lungawi tih a sawi tel nghal bawk.