Arsenal keeper thar David Raya

Tun season chhung cham turin Arsenal chuan Spanish goalkeeper David Raya chu loan hmangin an hawh. Brentford keeper hi a loan hun a zawh hunah a ngheta lei theihna dan pawh a awm nghal a ni.

Gunners hian Aaron Ramsdale an nei sa. England keeper Ramsdale leh kum 27 mi Raya te hian khelhna hmun an inchuh dawn - coach Mikel Arteta lung tiawitu zawk nih ngei an tum ang.

Raya hi Barcelona khawpuia piang a ni a, kum 16 mi chauh a nih laiin English club Blackburn Rovers a zawm, kum naupang tak a nih lai aṭangin England ramah a cheng tawh - Premier League dan leh hraiah chuan tualchhung mi anga chhiar theih zingah a tel hial.

Club thar a zawm chungchang sawiin Raya chuan, "Ka hlimin ka lawm êm êm a ni. Football zinkawnga chona lian leh hautak ka hmachhawn thei tur hian min tilawm," tiin a sawi.

Brentford tan Raya hian kum hnih daih contract a ziak thar tho a, mahse loan hmangin a chhuak zui tihna a ni. Brentford director of football Phil Giles chuan, "Contract chu a ziak ngei mai, mahse kan hnenah a lo kir ka ring tawh lo.

"Kan club ṭantute chuan zawhna an nei ngei ang tih pawh ka chiang, a chhanna chu club pahnih inremsiamna a ni. Club leh player chuan a theih anga rangin contract hi a ngheta ziah kan duh a ni," tiin a sawi.

Raya hian kum 2019 July thla khan Brentford hi a zawm a, a man zat chu pound maktaduai thum a ni. Bees hi Championship aṭangin kum 2021 khan Premier League a kaipui hial.

Season hmasa khan Brentford tan EPL match 38 a khel kim vek a, player pawimawh berte zinga mi a ni phak. Club tana a khelh ṭhat avangin an ram Spain tana khel tur pawhin kohna a dawng a ni.