Champions League rim a nam ṭan - qualifier an khel

Football season a inṭan meuh chuan football fan-ten khawdang kan hawi hman meuh lo - transfer boruak ngaihnawm karah inkhel hmuhnawm en tur a awm reng a, tunlai zet chu football khawvel boruak a nuam hle.

Champions League lam pawh group stage khelh la hun lo mah se qualifier lam chu khelh a ni leh der tawh a, qualifier lama club langsar inlan zingah Rangers, Galatasaray leh PSV Eindhoven te an chak a, Marseille erawh penalty lamah an tlawm thung.

European football-a club inelna sang ber Champions League-ah hian team 32-in inelna an hmachhawn ṭhin a, 2024-25 season aṭang chuan team 36-ah tihpun a ni tawh dawn - tun season hi team 32 an inelna hnuhnung ber tur tihna a ni.

Champions League qualifier hi preliminary round aṭanga khelh ṭan niin, playoff round hmanga a hmawr bawk ṭhin a ni. Thawhlehni zan khan third qualifying round second leg khelh niin, match khat tih loh chu khelh zawh a ni tawh a, playoff round khel tur a chiang - team pakhat tih loh chu.

A kalphung

Preliminary round-ah team pali inkhelin, hetah hian UEFA association coefficients ranking-a ram 52-55-naa team te an inel a, final-a chak chuan first qualifying round an lut - hetah hian ranking 22–51 inkara team te leh prelim paltlangte kha an inel leh.

Second qualifying round aṭang hian champions path leh league path-ah ṭhen leh a ni. Team 24 inelin, champion path-ah ranking 17-21 rama champion panga leh first round aṭanga tlang team 20 an inel a, league path-ah ranking 12-15 rama league pahnihna palite an inel.

Third qualifying round-ah second round champions path paltlang 10 lut chhoin, ranking 15 & 16 rama champion te nen an inel leh a, third round aṭanga league path paltlang team pahnih chuan ranking 5 & 6 ram league-a pathumnate leh 7-11 ram league-a pahnihnate an zawm ve leh bawk.

Tuna an khelh zawh tak hi third round a ni a, hetah hian ranking 13 & 14 ram champion pahnih chu champion path-ah an lo awm sa - third round champions path-a chak team parukten an zawm ang a, league path-a chak team palite an inel bawk ang.

Rangers an tlang

Season hmasa Scottish Premiership-a pahnihna Rangers hian third round aṭangin inelna an hmachhawn ṭan a, Swiss Super League-a pahnihna Servette FC an hmachhawn - Thawhlehni zan inkhelah team pahnih hi 1-1 in an inhnehtawk.

Mahse, team pahnih intawn hmasakah Rangers hian 2-1 in hnehna an lo chang tawh a, inkhel pahnih belhkhawmah 3-2 a chakin an tlang. Swiss club tan Dereck Kutesa chuan minute 22-naah goal hmahruai khung mah se captain James Tavernier chuan Rangers tan si phurh a sut a, 3-2 in Scottish club an tlang ta zawk.

Rangers hian playoff round-ah 3-1 a SK Sturm Graz hnehtu PSV Eindhoven an hmachhawn ang. Dutch club hian an intawn hmasakah 4-1 ngawtin hnehna an lo chang tawh a, inkhel pahnih belhkhawmah 7-2 in an chak.

Austrian club Sturm Graz tan William Boving Vick chuan goal hmahruai khung zuk mah se, Joey Veerman, Luuk de Jong leh Ricardo Pepi (penalty) ten PSV tan an chhanglet a, Rangers nen Champions League khelh an inchuh dawn.

A thlawn mai maw

Chelsea duh loh Pierre-Emerick Aubameyang-a'n a club thar Marseille tana a match hnihnaah goal hnih khung mah se a team a chhan thei lo a, Champions League khel loa season khat chu a hman leh phawt a ngai dawn.

Marseille hian Greek club Panathinaikos mikhualin, 2-1 in an hneh a, mahse, first leg nena belhkhawma 2-2 a nih avangin penalty pet a ni a, Panathinaikos lamin 5-3 in hnehna an chang daih.

Arsenal striker hlui Aubameyang hian minute hnihna leh first half hun pek belhah goal a khung a, 2-0 a ni. Mahse, hun pek belh minute kuanaah Greek club-in penalty hmuin, Fotis Ioannidis chuan goal-ah a chantir a, a team a chhanhim - a tawpah penalty hmangin an chak zui.

Galatasaray chuan 1-0 in Olimpija Ljubljana an hneh a, inkhela goal awmchhun hi Mauro Icardi khung a ni. Hun tawp thlengin goal dang a lut lo a, first leg-ah 3-0 a an lo chak tawh bawk avangin 4-0 in Turkish club an tlang.