Match 50 chak tling Alcaraz

Tennis world number 1 Carlos Alcaraz chuan tun season kal laiah match 50 hnehna a chang tling ta. Spanish star hian Cincinnati Open a match hmasa berah Jordan Thompson chu 7-5, 4-6, 6-3 in a hneh.

Alcaraz hian awlsam takin hnehna a chang mai bik lo, darkar thum chuang an inkhelh hnuah a vannei zawkah a ṭang. World number 55 Thompson hian set hnuhnung berah a service a hloh a tuar ta a ni.

Kum 20 mi Alcaraz chuan, "Tun hmain Thompson nen hian kan la inkhel ngai lo, tun ṭuma kan intawng ta hi a awlsam lo hle. Min nawr na êm êm a, kawng engkimah khan a ṭha hle bawk, a tawpah ka vannei hram," tiin a chak awlsam lo tih a sawi.

Wimbledon title a lak hnuah Alcaraz hian nomawi a la chawi leh lo, kar hmasa khan Canadian Open-ah inlan mah se quarterfinal-ah Tommy Paul a hneh lo, a tan tun tournament hi khelh ṭhat a pawimawh.

August 27 aṭangin US Open an khel ṭan dawn, champion lai Alcaraz hian tournament lian ṭha taka khel tur chuan tuna inbuatsaihna ṭha a neih a ngai, hna erawh a hautak chho dawn hle a ni.

Inkhel dangah Alexander Zverev pawh a chak. German tlangval hian tun hma lama Cincinnati Open champion ni tawh Grigor Dimitrov chu 6-2, 6-2 a hnehin second round a inhlangkai.

Zverev-a'n Cincinnati Open a khelh hnuhnung ber chu kum 2021 kha a ni a, a hnuah a kerek hliam vangin rei tak a chawl. Tun ṭumah hian seeded 16-na pek a ni a, a tan chona thar a ni thei ang.

Kum 26 mi Zverev chuan, "Kar hmasa Canadian Open kan khelh kha chuan ka khel chhe êm êm a, a nihna tak sawi chuan vawi khat kha chu chak ve mah ila ka khelh dan kha lungawi pawh a harsa hle.

"Tunah erawh lawmna tur tam tak ka nei. Grigor khan a service na hle a, a ball vuak a nain dawnsawn pawh a harsa. Mahse, a bul kan ṭan fuh avangin a hmawr pawh ka bawk ṭha," a ti.

Zverev bakah hian Stan Wawrinka pawh a chak. Switzerland tlangval, major title pawh pathum ngawt la tawh Wawrinka hian Brandon Nakashima chu 6-3, 6-7 (5/7), 6-3 a hnehin second round a inhlangkai ve bawk a ni.

Inelna neih laiah hian British player ṭha Dan Evans leh Cameron Norrie te erawh hneh nei loin an match hmasa berah an tla nghal.