Wozniacki zinkawng a tawp

US Open inbuatsaihna zinga langsar tak Cincinnati Open khelh laiah, hmeichhe singles champion tura rinkai zinga mi Caroline Wozniacki chu a match hmasa berah a chak lo nghal.

Danish nula hi Varvara Gracheva nen darkar khat leh minute 35 an inkhelh hnuah 6-4, 6-4 in a chak lo zawkah a ṭang. Hard court inelnaah beisei phak lo mah se US Open atan erawh beisei a nei tih a sawi.

Kum 33 mi Wozniacki chuan, "US Open atan inbuatsaih turin ni 10 chhung hun ka la nei, chuvangin thil tam tak a la inthlak danglam thei a ni, tun aia ṭha zawk hian Grand Slam chu ka khelh theih ngei ka beisei," a ti.

Australian Open 2018 champion Wozniacki hian tennis a chawlhsan zuk tawh a, fa pawh a nei tawh. Mahse, Serena Williams leh Kim Clijsters te hnungzuiin tennis huangah a rawn kir leh a, beisei ang tak result erawh a la nei thei mai bik lo.

Season khat chhunga Grand Slam hnuhnung berah Wozniacki inlan ngei a tum a, hetihlai hian hmeichhe player zingah Zhang Shuai a inlan thei dawn lo. US Tennis Association chuan Chinese nula hi hliam vangin a inhnukdawk tih an puang chiang tawh a ni.