Final khel tur England

Nikuma a vawi khat nana European champion dinhmun luahtu England chuan an ram chanchina a vawi khat nan World Cup final an lut leh ta - a vawi khat nan champion an tum leh dawn!

Stadium Australia, Sydney-ah stadium khat vekin mipui an pungkhawm a, mipui 75,784 pungkhawm zinga a tam zawk chu inelna thlengtu Australia final lut lai hmuh duha pungkhawm an ni.

Mahse, beisei ang ngawt erawhin thil a kal bik lo - minute 36-naah Manchester United attacking midfielder Ella Toone chuan goal hmahruai a khung a, goal mawi bik a ni.

Goal dang lut loin chawlhlawk hman a ni a, second half-ah Australia-in beiseina an nei thar. Chelsea forward ṭha mi, Australia innghahna ni bawk Sam Kerr chuan minute 63-naah si phurh a sut.

Kum 29 mi Kerr hian hliam vangin group stage-ah match a khel lo a, round of 16 aṭanga inlan ṭanin England a hmachhawn hi tun inelnaa bul a ṭan hmasak ber a ni.

Mahse, Australia hlim chhung erawh rei lo tak a ni. Minute 71-naah Matildas (Australia hmeichhe team sawina) tlarhnung tihsual zar zoin Lauren Hemp chuan hmahruaina goal a khung a, minute 86-naah Arsenal forward Alessia Russo chuan a belhchhah bawk.

A vawi khat nana World Cup semifinal khel Australia mipuiten inelna an ngaihlu a, England nen an intawn hma boruakte chu ropui tak a ni - a tawpah erawh team ṭha zawk England an chak a, Matildas tan chenna ngai loh final ram fang turin kum li dang nghah leh phawt a ngai.

August 19, Inrinni chawhnu dar 1:30-ah Australia hian Sweden nen pathumna nih an inchuh zui ang a, August 20, Pathianni tlai dar 3:30-ah Spain leh England ten champion an inchuh thung ang.