Atletico-in Kondogbia an la lut

Ateltico Madrid chuan Valencia aṭangin midfielder Geoffrey Kondogbia an lalut a, Thomas Partey hmun ruak luah tura an lakluh midfielder man zat hi tarlan ni lo mah se pound maktaduai 18 bawr vel ni tura ngaih a ni. 

Central African Republic midfielder hian Atletico-ah kum li chhung khel turin contract-a ziak a, Valencia tan La Liga season thum a khelh hman bakah Sevilla tan season hnih a lo khelh tawh bawk avangin Spanish football-ah a mikhual lo - Valencia tan tun season-ah league match nga a khel hman.

La Liga-ah transfer bazar khar ni tawh mah se Atletico-in Partey an hralh khan a release clause-in an hralh thei a, release clause hmanga player an hralh avangin ni 30 chhung transfer bazar khar hnuah player dang lalut turin hun an la nei a ni. 

Atletico chuan, "Box-to-box midfielder niin midfield-ah a ṭangkai em em a, tlarhnung ven leh tlarhma nawr kawngah pawh tha thawhhlawk tak a ni," tiin an midfielder thar chungchang hi an sawi. 

Monaco midfielder hlui Kondogbia hian France tan match nga khel hman mah se friendly match vek a nih avangin a nu leh pa kaltlanga a khelh theihna Central African Republic tana khelh a thlang zui a, 2019 Africa Cup of Nations-ah khan CAR tan qualifier match thum a khel zui a ni.