Europe-ah Real an harh ta

Champions League-a an match hmasa pahniha hnehna an chan zawh loh hnuin Real Madrid an chak ve leh ta a, an mikhual Inter Milan chu 3-2 in an hneh. 

Real tana Karim Benzema leh Sergio Ramos-te goal hmahruai chu Inter-in Lautaro Martinez leh Ivan Perisic hmangin chhanglet mah se Rodrygo chuan Real chakna goal a khung a, last 16 luh beiseina a nung thar ve leh ta. 

Group B inkhel dangah Borussia Monchengladbach chuan 6-0 ngawtin Shakhtar Donetsk  an sawp a, German club tan khualmualah Alassane Pléa chuan hattrick-a siam.

Ramy Bensebaini leh Lars Stindl-ten goal khat ve ve an khung bawk a, Shakhtar defender Valeriy Bondar chuan an lamah a ti lut bawk. 

Real hian tun season Champions League-a an match hmasa berah Shakhtar chu 3-2 in an ngam lo a, Gladbach chu 2-2 in an inhnehtawkpui hram bawk - season hmasa nena chhiar telin Champions League-a an match hnuhnung paliah hnehna an chang zo lo. 

Thawhlehni zanah erawh Real an insiamṭha - Benzema chuan minute 25-naah goal hmahruai a khung a, minute 33-naah Ramos chuan a tauh lut bawk. 

Ramos-a'n Real tan match 659-a khelha goal 100-a khung tlinna chiah a ni a, defender goal khung zat atan chuan ropui tak a ni. 

Real hi nuamsa taka chak tur angin an lang hman a, Inter ngaihdan a dang thung. Martinez chuan Nicolo Barella backheel pass aṭanga a ball hmuh chu goal-ah a chantir a, minute 68-naah  Ivan Perisic khung tur a siamsak bawk. 

Mahse, Zinedine Zidane-a nauten chak an duh zawk - Rodrygo chuan hun tawp nan minute 10 chauh a awm tawh tihah goal a rawn khung leh a, Eden Hazard telna Real-in 3-2 in hnehna an chang. 

Real-in hnehna an chan avangin group B-ah Shakhtar nen point li ve ve hmuin pathumna an ni a, Inter erawh point hnih nen table mawng luahlumtu an ni. 

Spanish club hian Pathianni zan dar 1:30-ah league match khel turin Valencia an lenchilh zui dawn a, La Liga table-ah hmahruaitu Real Sociedad chu match khata khel tlem chungin point khatin an phak lo mek. 

Inter Milan-in league match khel turin Pathianni zan dar 7:30-ah Atalanta an lenchilh dawn - Serie A table-ah parukna an ni a, coach Antonio Conte dinhmun a him lo.