Arsenal mikhual tur Molde

Zaninah Europa League khelh chhunzawm a ni dawn, boruak ṭha lai Arsenal chuan dar 1:30-ah Molde an mikhual ang. Premier League club dang Tottenham leh Leicester City te pawh an inlan ve dawn bawk.

Jose Mourinho enkawl Spurs hi an group match hnuhnunga chak lo an ni a, zanin hian Ludogorets mualah point thum hmuh an tum ang. Foxes pawh an mikhual Sporting Braga lakah chak tura rinkai zawk an ni.

Mikel Arteta-a'n Manchester United lakah a naute hnehna a chanpui a, United manager Ole Gunnar Solskaer-a'n tun hma lama a lo enkawl tawh Molde pawh hneh zui ngei a tum dawn.

Defender David Luiz chu a dinhmun a la chiang lo, United an hneh ṭuma hliam tenau tuar Rob Holding erawh inlan thei tura ngaih a ni - Gabriel leh Shkodran Mustafi te an la awm bawk avangin tlarhnung lam an buai lo tura ngaih a ni.

Player ṭha an chawlhtir a rinawm, chutih rualin - Granit Xhaka, Cedric Soares, Joe Willock, Dani Ceballos, Ainsley Maitland-Niles leh Nicolas Pepe te an la nei. Norway club hi awlsam taka hneh theih an ni bik lo mai thei, match hnih aṭanga point ruk hmu thei an nih avangin zuam sual theih an ni ang.

Antwrep muala an tlawm ṭumin Mourinho a lungawi lo a, a player 11 ngawt thlak a duh thu a sawi hial. Zanina Ludogorets an lenchilh hunah chuan a tir aṭanga a tawp thlengin an bei dawn tih a hriat.

North London club hi Brighton lakah an insiamṭha tawh. Real Madrid aṭanga an hawh Gareth Bale-a'n goal a khung bawk avangin an boruak pawh a ṭha chho viau, chak la nei lo Bulgarian club tan Spurs mikhual hi thil châkawm tak a ni hran lo ang.

Portuguese manager Jose-a'n nomawi a chawi theihna tur a nih chuan tih hreh a nei ngai lo, Europa League-ah pawh hian an chak theihna tur a nih chuan a player neih ṭhat a chhawr leh a nih pawhin a mak lo ang - khualmualah point thum hmuh an tum dawn.