Man City-in Super Cup an chawi

Manchester City chuan an trophy nomawi dahna bawmah an la chawi ngai loh 'UEFA Super Cup' nomawi an hung thei ta. Pep Guardiola hote hian August 16, Nilaini zan khan Sevilla an hneh.

Athens-a inkhelah Europa League champion Sevilla-in Youssef En-Nesyri hmangin an khung hmasa a, Cole Palmer hmangin City-in siphurh an sut. Penalty Shootout-ah English club 5-4 in an vannei.

En-Nesyri a zuang sang

Man City-in hliam vangin Kevin de Bruyne an la chhawr thei lo a, Belgian midfielder aiah Phil Foden a inlan. Rawlthar duhawm Cole Palmer pawhin Erling Haaland leh Jack Grealish te kiangah inkhel bul a ṭan.

City-in player thar Josko Gvardiol pawh tlarhnungah bul an ṭantir a, Ederson-a'n bul a ṭan bawk avangin Community Shield-a an chetsual anga tihsual nawn an tum tawh lo.

Pep Guardiola hoten inkhel an thunun nghal a, mahse Spanish club-in goal an khung hmasa zawk. Minute 25-naah vei lam aṭanga Marcos Acuna cross ṭha chu En-Nesyri-a'n a tauh goal a, ball tauh tur hian Nathan Ake leh Gvardiol te inkar aṭangin a zuang!

City hian first half-ah 70% vel zet ball an chang a; Jack Grealish, Cole Palmer, Ake leh Gvardiol te hmangin chance nei mah se Bono an su tlang thei lo.

Palmer a puitling

Second half-ah Sevilla-in bul an ṭan ṭha a, En-Nesyri finishing tawih deuh se chuan 2-0 a hmahruai tur an ni. Minute 50-naah vei lam aṭanga Lucas Ocampos cross duhthusam chu En-Nesyri-a'n goal-ah pet mah se Ederson-a'n a dansak.

Ocampos hmuhnawm chhunzawm mah se goal an khung belh lo. Minute 63-naah Rodri ball pet thlawk mawi zet chu Palmer-a'n a tauh lut. Kum 21 mi Palmer hian Community Shield-ah goal a khung tawh bawk a, Super Cup-ah pawh hian a khelh ṭhat avangin man of the match-ah an thlang.

Palmer hian Bono tan hna a siam zui a, goal dang erawh a khung belh lo. City keeper Ederson pawhin hna a nei a, En-Nesyri-a'n a lak tlang hnuah ṭha takin a dansak.

Minute 90 chhungin 1-1 in an inhnehtawk a, penalty-ah City 5-4 in an vannei ta zawk.

Palmer hmalam hun a chiang lo

UEFA Super Cup leh Community Shield-a goal khungtu Cole Palmer hmalam hun a chiang lo a, English midfielder hi Manchester City chhuahsan thei dinhmunah a ding.

City manager Pep Guardiola chuan, "A cham tur leh tur loh hi ka hre bik lo. Training ṭan tirh kha chuan chhuah a duhah ka ngai a, tunah erawh a duh dan hi ka hrethiam lo. Loan chuan a chhuak dawn lo. Thil thleng thei pahnih a awm, kan hralh loh chuan a cham ang," tiin Palmer hmalam hun a sawi.

Kum 21 mi Palmer chungchang sawi chhunzawmin Pep chuan, "A rilru a paukhauh tih a lantir. Tawnhriat nei ṭha Acuna dan hi player naupang tan chuan a harsa a, chutichung chuan hna ṭha tak a thawk. A khel ṭha a, goal ṭha tak a khung bawk," tiin a fak.

City hian player langsar Riyad Mahrez leh Ilkay Gundogan te an chân tawh a, Kevin de Bruyne a inhliam leh bawk. West Ham aṭangin Lucas Paqueta leh Rennes forward Jeremy Doku pawh la lut dawn ta reng se Club World Cup thenga khelh tur an neih avangin squad chhah ṭha an mamawh hle.

Palmer hian kumin June thlaa neih 2023 UEFA European Under 21 Championship-ah England a champion pui a, inrintawkna a neih vanglai tak a nih avangin khelh tam pawh a duh ang. Tun hmain loan-in a la chhuak ngai lo a, Manchester-a piang a nih bakah club academy chhuak a nih bawk avangin City chhul chhuak dik tak a ni.