Arsenal defender Timber a hliam na

Premier League season an ṭan chauh a, beiseina sang tak nena Arsenal pantu Jurrien Timber chu a khup ding lam hliam vangin a chawlh a ngai dawn, a hliam hi zai a ngai dawn - a chawlh chen tur tak sawi theih ni lo mah se hun chu a mamawh rei dawn.

Gunners hian Emirates Stadium-ah Nottingham Forest an mikhual a, player dang bula a awm loh laiin Timber hi a inhliam, tumah khawih lohin a hliam tihna a ni, thlak a ngai zui nghal bawk.

Nilaini zan khan Arsenal chuan thuchhuah siamin, "Jurrien Timber hliam chu kan beisei aiin a lo nasa, a khup dinglam hliam zai a ngaih dawn avangin hun eng emaw chen chu a chawlh rih a ngai dawn.

"Club chuan a rang thei ang bera dam leh turin duhsakna kan hlan a, medical team lam pawhin tluang leh ṭha taka an hna an thawh theih kan beisei," tiin an player chu an thlahthlam loh tur thu an sawi.

Netherlands international hian Ajax aṭangin North London club hi a zawm a, pound maktaduai 34 man a ni. Tlarhnung lai leh a sirah a khel thei a, defender Oleksandr Zinchenko a inkhelh theih loh lai a nih bawk avangin hmun pawimawh a chang nghal.

Community Shield leh EPL-ah inkhel bul a ṭan a, khelmual chhunga a chet danah Gunners ṭantute an lungawi viau. Mahse, tunah erawh a tel loa season hman dan an zir a ngai leh ta zawk dawn a ni.

Arsenal manager Mikel Arteta chuan, "Jurrien Timber hliam hi keini tan chuan chânna nasa tak a ni. Mi ṭha leh nelawm tak a ni a, hmalam hun thui tak kan thlir laia hetiang thil a thleng hi pawi kan ti takzet.

"Player zawng zawng inkhel turin an inpeih a ngai tihna a ni a, kan pawimawh vek avangin tu pawh inpeih renga awm turin ka duh," a ti a, tun hnaiah Zinchenko chuan training a zawm pangngai thu a sawi bawk.

Tun dinhmunah striker Gabriel Jesus a hliam mek bawk a, player dang zingah harsatna lian tham nei an awm lo thung. Arsenal hian August 21, Thawhṭan zanlaiah tun season an league match pahnihna atan Crystal Palace an lenchilh ang.