US leilungah Djokovic a chak leh ta

Novak Djokovic chuan kum hnih hnua a vawi khat nan United States leilung a rap ve leh thei ta a, hard court inelna Cincinnati Open-ah Serbian star hian Alejandro Davidovich Fokina hnehin last 16 a inhlangkai.

World number 2 Djokovic hi round hmasa berah chuan a bye, round of 32 aṭangin a inlan ṭan. A khingpui Spanish player lakah Djokovic hian set khatna chu 6-4 in a la nghal, set hnih an khelh leh hmain Fokina chu hnungzâng na vangin a inhnukdawk.

Grand Slam vawi 23 champion tawh Djokovic-a'n tukin hian Gael Monfils a hmachhawn leh ang, inkhel dangah France tlangval hian Alex de Minaur chu 7-5, 6-4 in a lo hneh ve thung a ni.

Kum 36 mi Djokovic hian Covid-19 laka invenna damdawi a la duh lo, hei vang hian kum hnih chhung chu US-ah a zin lut thei lo a, hei bakah hian Australian Open pawh vawi khat a khel thei lo bawk.

Tunah chuan hripui lengin ziaawm lam a pan tawh a, mihring nunphung a tikhaihlak tawh lem lo. Hri danna la lo tan pawh ram danga zin turin harsatna a awm tawh lo, world number 2 Djokovic tan pawh harsatna a awm tawh lo a ni.

Djokovic chuan, "Hun hi a kal chak khawp mai, kei chuan Cincinnati Open ka khelh hnuhnung ber kha hmanni lawk angah ka la ngai a, mahse kum hnih a lo liam hman der tawh si," a ti a, kum 2018 anga champion leh theih ngei a inbeisei thu a sawi bawk.

US chungchang sawi zuiin Djokovic chuan, "Khawvel ram ropui a ni a, tennis tournament lian tak tak kan khelh ṭhinna a ni bawk. Zin lut ve thei loa awm kha a hrehawm, tunah chuan ka tan hun ṭha a rawn inherchhuak ve leh ta hi ka lawm hle," a ti.

Inkhel dangah Max Purcell chuan seeded pathumna Casper Ruud chu 6-4, 3-6, 6-4 in a hneh. World number 70 Purcell hian ranking sang zual 10 china mi a hneh vawi khatna a ni a, chak tur hian a khingpuiin break point vawi sarih a hmuh zinga paruk chu a inchhanhim.

Grand Slam vawi thum champion tawh Stan Wawrinka pawhin tualchhung tlangval, seeded 16-na ni phak Frances Tiafoe chu 6-3, 6-4 in a hneh. Swiss star hian a match lehpekah chuan Purcell hi a hmachhawn ang.

Player langsar dang - Daniil Medvedev leh Alexander Zverev te pawh an chak a, player ṭha pahnih hi last 16-ah an inhmachhawn zui dawn. Stefanos Tsitsipas, Taylor Fritz, Hubert Hurkacz leh Dusan Lajovic te pawhin an khingpui ṭheuh an hneh.