Zanin aṭangin Kane a hun a inṭan dawn ta

Bundesliga chu zanin ṭangin khelh ṭan a ni dawn. Match hmasa berah champion lai Bayern Munich chuan Werder Bremen khelmual an tlawh dawn a, zanin dar 12:00 hian Weserstadion-ah an inkhel ang.

Inkhel hi Sony Ten 2-ah a en theih dawn a, Bayern-in Harry Kane an lak thar avangin entu an pung sawt dawn. Chutihrualin Bavarians hian DFL Supercup-ah RB Leipzig 3-0 ngawtin an hneh lo a, Thomas Tuchel-a tan Bundesliga nomawi humhim hi a awlsam dawn lo.

Bul ṭan tur Kane?

Bayern hian kar liam ta Inrinni khan Harry Kane an la lut fel a, darkar tam pawh a ral hmain Supercup-ah an chhawr nghal. Ni khat em pawh a ral hmaa bench aṭanga an luhtir theih chuan kar khat dawn training hnuah chuan bul a ṭan ngei tura ngaih a ni.

Goal khung theih vanga lar Kane hian Bayern kawr a hak hmasak berah minute 27 khelin goal khung chu sawi loh, vawi thum chauh ball a tawk.

Chutihrualin Kane hi German player ṭha rual Jamal Musiala, Leroy Sane, Serge Gnabry leh Thomas Muller ten an chawm thei dawn a, Premier League ang thoin Bundesliga-ah a khung hnem a rinawm.

Hriat tel atana ṭha erawh Bundesliga-ah hian team 18 chauh an awm avangin season khatah match 34 chauh an khel. Robert Lewandowksi khan Bayern tana season hmasa berah goal 17 a khung a, a hnu lamah chuan goal 20 khung tling ziahin 2020–21 season-ah phei chuan goal 41 a khung.

Kane hi Lewy nen an khaikhin dawn a, an beiseina phak hi a harsa dawn. English striker hi England pawna a inkhelh hmasak ber a ni a, Premier League-ah goal 20 aia tam khung fo mah se match tlem zawkah goal tam zawk khung turin an beisei ang.

Pressure a sang

Thomas Tuchel-a'n kumin March thla aṭangin Bayern Munich-ah manager hna a thawk ṭan a, a enkawl ṭantirh hian Bundesliga, DFB Pokal leh UEFA Champions League-a champion thei vek an ni. Mahse, season a tawp meuh chuan Bundesliga pawh vanneih vangin an chawi hram.

German manager Tuchel hnuaiah nomawi pakhat chauh an la chawi a, DFL Supercup-ah an mualpho avangin Chelsea leh PSG manager hlui hi supporter zingah ban duh pawl an awm der tawh.

Bayern hian Lewy an chân hnuah ngai an la awh leh lo a, Europe-a team ṭha ber zinga mi khan tun dinhmunah an tiatpui an elpha rih lo. Tuchel-a'n pressure a nei a, Bayern-in pressure an nei bawk.

Fullkrug telna

Bayern khingpui tur Werder Bremen hi German club vantlang ni mah se German striker goal khung thei Niclas Füllkrug telna a ni. Season liam ta khan Fullkrug hian league-ah goal 16 khungin Christopher Nkunku nen joint top scorer an ni.

Bayern forward Thomas Muller pawhin, "Fulle hian goal awmna a hria," tiin Fullkrug hi a fak a, zaninah Bavarians tlarhnungin an ngaihthah thiang lo ang.

Bavarians tan hian player thar Kim Min-jae pawh a inlan a rinawm a, South Korean defender hian season liam ta khan Napoli chu Serie A-ah a champion pui a ni.