Liverpool-in midfielder Endo an hnaih

Vawi hnih ngawt Chelsea an ngam loh hnuin Liverpool chuan midfielder thar an nei hnai a, Stuttgart midfielder Wataru Endo chu Anfield lama sengluh turin inbiakna an neihpui mek - he thuziak i chhiar meuh chuan an in la lut fel tawh hial mai thei.

Reds hian Brighton & Hove Albion midfielder Moises Caicedo leh Southampton midfielder Romeo Lavia dawr ve ve mah se, player pahnih hian Chelsea an thlan zawk avangin Reds-in an chang lo.

Liverpool hian nipui transfer-ah midfielder Fabinho, Jordan Henderson, James Milner, Naby Keita leh Alex Oxlade-Chamberlain an chhuahtir avangin midfielder an mamawh takzet a, Endo lam an hawi ta.

Stuttgart hi season hman zawh takah khan relegate thei dinhmunah an ding a, mahse, relegation playoff-a Hamburg hnehin an inhamtang - a club khelhna che ṭha lutuk lo mah se Endo erawh a khel ṭha pangngai viau.

Kum 30 mi Endo hian season hman zawh takah khan Bundesliga match 33 khelin goal nga a khung a, assist vawi li a nei bawk. Japan international niin, ram tan vawi 50 ngawt a inlan tawh.

World Cup 2022-ah pawh khan ram tan feh chhuakin, Germany leh Spain awmna group-a hmahruaitu ni chungin last 16 an lut thei a, mahse, knockout round-ah hian penalty-a Croatia ngam loin an tla.

Pound maktaduai 16 man vel ni tura sawi Endo hian season hman zawh takah khan league match 33 khelin goal nga a khung a, assist vawi li a nei bawk. Kar hmasa lawk pawh khan German Cup-ah la inlanin, 4-0 a TSG Balingen an hnehna inkhelah an goal lina a khung.