Forest manager a ṭawng fimkhur

Zanin dar 12:15 hian Premier League inkhel pakhat a awm dawn, table hnuai lama inbei tura ngaih Nottingham Forest chuan City Ground-ah Sheffield United an lo mikhual ang, team pahnih hi an match hmasa bera chak lo ve ve an ni.

Nipui bazar hmasa khan Nottingham Forest hian player an la lut hnem a, an tum ang ngeiin English football inelna sang berah an inhamtang. Nikum aiin kuminah hmasawn ngei an tum dawn.

Forest manager Steve Cooper chuan, "Sheffield United nen hian sulhnu hrang hrang kan lo nei tawh, 2021-22 Championship playoff-ah intawngin a vannei zawk kan lo ni tawh, inkhel boruak sang ngam tak an nihzia kan hrechiang.

"Playoff-a vanduai zawk nih hrehawm turzia chu kan hrethiam, an chak lohna kha insiamṭhain tun season atan chuan playoff pawh khelh ngai loin Premier League atan an rawn tling ta a ni a, team hmachhawn châkawm loh zinga mi an ni ang," a ti.

Cooper sawi ang hian team pahnih hi Championship lamah an lo inhrechiang tawh. EPL erawh a boruak a danglam dawn - Sheffield United hian English football inelna sanga cham zel an duh a nih chuan a tir lama point hmuh hram zel an tum a ngai ang.

Sheffield tan City Ground aṭanga point hmuh erawh thil awlsam a ni dawn lo. Nottingham hian season hmasa khan EPL-ah point 38 an hmu a, heng zinga point 30 chu anmahni khelmual aṭanga an hmuh a ni.