US Open khel lo tur an hrawl

Tennis ielna lian US Open khelh hun a hnai a, player inlan thei lo tur a hriat chhoh zel. Mipa singles player ṭha Marin Cilic leh Denis Shapovalov ten New York khawpui an pan theih loh tur thu an tichiang a, champion hlui Juan Martin del Potro pawh a tel dawn lo.

August 28, Thawhṭanni aṭangin New York khawpuiah hard court inelna lian hi khelh a ni dawn. US Open 2014 champion Cilic hi hliam vangin tun season kal laiah a la inkhel lo, chuvangin nomawi a chawi tawhna hmunah pawh a hmel kan hmu dawn lo a ni.

Shapovalov pawh Wimbledon hnu lamah a la inkhel leh lo, tun hmain US Open-ah hian semifinal hial lo thleng tawh mah se, hliam vang bawkin kumin chu a inkhelh loh a ngai dawn.

Juan Martin del Potro pawhin chanchin ṭha a nei thei rih lo. Argentine tlangval hian a hun tam zawk chu hliam vanga buai nan a hmang emaw tih mai tur a ni a, a tournament ngainat ber a khelh loh tur thu hi a tichiang tawh.

World number 3 hlui Del Potro chuan, "Tournament dang zawng aiin US Open hi chu ka ngaina a, khelh ngei pawh ka duh ṭhin. Theih ni se la chuan kuminah pawh inlan ngei ka duh, mahse ka taksain a tlin ngang lo," tiin a sawi.