Besiktas-ah Chamberlain a kal

Liverpool-in an chhuah zalen tak Alex Oxlade-Chamberlain chuan club thar a nei ve leh ta a, Turkish club Besiktas chu kum thum chhung khel turin a pan.

Player hmabak nei êng tak ni ṭhin Chamberlain hian kum 2017 khan Liverpool chu Arsenal aṭangin a pan a, a man zat pawh hetihlai hian pound maktaduai 35 lai a la tling.

Liverpool-ah pawh hmun pawimawh chang nghalin, a season hmasa berah match 42 khelin goal nga a khung a, assist vawi riat a nei thei. Mahse, beisei angin thil a kal reng lo.

Khup hliam vangin vawi hnih ngawt a talbuai a, hliam a neih hnuah ngai a awh leh tawh lo. Season hman zawh takah phei kha chuan inelna hrang hrangah match 13 chiah khelin goal khat a khung - heng zinga match riatah hian bench aṭanga luhtir a ni a, a bul ṭan match liah pawh a khel tluan lo vek.

Liverpool tan hian match 198-ah goal 20 khungin assist vawi 32 a nei a, Premier League, League Cup, Champions League, UEFA Super Cup leh FIFA Club World Cup-ah te nomawi a chawipui.

Chamberlain hian Reds-ah khan kum khatah £6.5mtd a hlawh nia sawi a ni a, Besiktas-ah erawh kum khatah £2.2mtd hlawhin, match a khelh apiangin £8,600 (Rs. 9,10,647) thleng hlawh theihna dan a nei bawk.

Hei chauh hi a ni lo. Besiktas a zawm avang hian lawmmanah £1.3mtd a dawng nghal bawk - Turkish club hi Turkish Super Lig-ah vawi 16 zet champion tawhin, season hman zawh takah khan pathumna an ni hram.