Match hnihnaah Venus Williams chak lo

Venus Williams chuan beisei han nei sang ve viau ṭhin mah se a vanglai a pel tawh a, tun hma anga result ṭha neih reng kha a thei tawh lo. Cincinnati Masters khelh laiah Zheng Qinwen hneh loin a zinkawng a tawp.

Nimin zing round of 32 inkhelah Venus hi a dinhmuh pawh a ṭha hman, world number 1 hlui hian set khatna a lak bakah set hnihnaah pawh 2-0 in hma a hruai, mahse a tawpah world number 24 Zheng Qinwen chu 1-6, 6-2, 6-1 in a chak daih.

American star Venus hian game hnuhnung 11 a hloh vek tihna a ni. Chinese nula Zheng hian a match lehpekah chuan world number 1 Iga Swiatek a hmachhawn leh dawn, inkhel a hmuhnawm ang.

Chak lo mah se Williams chun US Open atan wildcard a hmu tho, kum 1997 aṭang khan Flushing Meadows-ah hian a inlan ṭan tawh a, 2000 leh 2001 te khan champion nomawi a lo chawi tawh, kuminah erawh champion tura rinkai a ni dawn lo.

Cincinnati Masters khel ṭha lo, mahse tun hma lama sulhnu lo nei ṭha tawh Caroline Wozniacki pawh US Open buatsaihtu lamin wildcard an pe. Denmark player hian tennis a chawlhsan hnuah tun hnai khan a lo kir leh a ni.

Inelna neih laiah world number 1 Swiatek erawh a kaltluang. Polish star hian tualchhung nula Danielle Collins chu 6-1, 6-0 in a sawp, tun hnaiah hard court tournament khel ṭha tawk lo mah se Cincinnati Masters erawh a khel ṭha rih viau.

Kum 21 mi Swiatek chuan, "Tihsual ka nei tlem kha a lawmawm, unforced error kan ngah hi chuan inrintawk pawh a harsa ṭhin. Tun ṭumah erawh a tir aṭangin duhthusama ṭhain ka khel," tiin a khelh danah a lungawi hle.

Tualchhung nula, world number 3 Jessica Pegula chuan last 16 lut turin Martina Trevisan chu 6-7 (2-7), 6-2, 6-3 in a hneh. Kar hmasa khan Pegula hian Canadian Open nomawi a chawi, tunlai hian a khel ṭha thei hle a ni.

Wimbledon champion Marketa Vondrousova pawhin Russian nula Anastasia Popatova chu 6-4, 6-2 in a hneh a, seeded 14-na Daria Kasatkina pawhin Varvara Gracheva paltlangin a thiam zual 16 zingah a inhlangkai ve bawk.

Maria Sakkari a chesual teuh hle, seeded pariatna Sakkari hian Romanian nula Sorana Cirstea lakah set a hloh hmasak hnuin 2-6, 6-3, 7-5 in a chak let hram a ni.