Barca-ah Deco a kir

Barcelona chuan an player hlui Deco chu an la kir a, player ni tawh loin club director of football hna a chelh dawn. Kum 45 mi Deco hi Nilaini khan an tlangzarh a, tuna director of football hna chelhtu Mateu Alemany hi tun transfer zawh hian a chawl thung ang.

Deco hian kum thum daih contract a ziak a, football bika thu ber a ni dawn. Barcelona kalphung tur duangtu a nih bakah coach leh coaching staff te nen squad dintu a ni ang.

A hun laia midfielder ṭha ber zinga mi Deco hi Brazil-a piang a ni a, Corinthians aṭanga hming chherin Porto a zawm hnuah a lar lehzual. Porto-ah hian Jose Mourinho hoin UCL leh UEFA Cup an chawi. Portugal khua leh tui nihna a neih hnuah Portugal tan a khel a, ram tan match 75 khelin goal nga a khung.

Barcelona tan Deco hian season li chhung a khel a, La Liga nomawi pahnih a chawi bakah Champions League a chawi bawk. Kum 2008 khan Barca hi a chhuahsan a, kum 15 hnuah hna thar chelh turin Deco hi a kir leh a ni.