Punjab hnehtu East Bengal an tlang

Indian Super League club East Bengal chuan Durand Cup-ah an ti mai mai lo tih pholangin, Nilaini zan khan Punjab FC chu 1-0 in an hneh a, knockout round an lut.

Kolkata club tan Javi Siverio chuan inkhela goal awmchhun a khung a, ISL kai thar Punjab lamin a chhanletna tur an neih loh avangin East Bengal an chak - Durand Cup-ah knockout round hi quarterfinal aṭangin a inṭan.

Nimin khan group B inkhel lamah Jamshedpur FC chuan hnehna an chang ve bawk a, ISL club hian Indian Navy chu 1-0 in an hneh. Ashely Alban Koli chuan inkhela goal awmchhun a khung.

Men of Steel (Jamshedpur sawina) tan Mizo rawlthar Lalhriatpuia Chawngthu chuan goal khungna remchang a nei a, mahse, a penalty pet a chhuih lut thei lo.

JFC hi an match hmasa berah Mumbai City chuan 5-0 in an sawp a, an match hnihnaah an chak avangin beiseina an nei thar - chutihrual chuan Mumbai club chetsual an chan tel a ngai tawh ang.