Valencia-in Silva an thlah dawn

Spanish club ṭha Valencia chuan an club legend chawl mai tur David Silva thlahna hun buatsaih an tum a, a hun leh ni tak erawh sawi chian theih a la ni lo.

Kum 37 mi Silva hian Valencia aṭanga a professional zinkawng zawh ṭanin, an academy chhuak a ni a, 2003-10 inkar chamin a kar lakah Eibar leh Celta Vigo-ah loan-in a khel bawk.

Valencia tan match 168 khela goal 32 khungin, assist vawi 36 a nei a, kum 2010 khan Manchester City a pan. City-ah hian Premier League nomawi pathum, FA Cup (2), League Cup (5) leh FA Community Shield (2) a chawi hman.

Kum 2020 khan Spain-ah kirin Real Sociedad a zawm a, mahse, thla hmasa khan a khupah hliam neiin, kum 37 mi a nih tawh bawk si avangin inkhelh a chawlhsan thu a puang - tunah chuan a club hmangaihin a thlah dan tur an ngaihtuah mek.

Valencia hian zanin dar 1:00-ah La Liga match khelin Las Palmas an mikhual dawn a, zan dar 11:00-ah Real Mallorca chuan Villarreal an mikhual bawk ang.