Zanin dar 10:00-ah Spurs vs Man United

Manchester United leh Tottenham Hotspur inkhel a nung ṭhin a, Premier League inkhela en châkawm zinga mi hi zanin dar 10:00 hian Tottenham Hotspur Stadium-ah khelh a ni dawn. Spurs hian Harry Kane tel loa nun an zir dawn a, Erik ten Hag-a hote hmaah fiahin an awm ang.

Nipui transfer-a thil thlen dan thlir mai chuan Man United hi buk rit zawk an ni a, amaherawhchu Ten Hag-a hote han season bul a ṭan ṭha tawk lo. Zanin inkhelhna tur hi Spurs khelmual a nih bawk avangin eng result pawh thleng thei a ni.

Record ṭha

Man United hian Spurs lakah record an nei ṭha. Premier League match hnuhnung pakuaah vawi khat chauh an chak lo a, vawi ruk ngawt chakin vawi hnih an inhnehtawk.

October 2020-a Spurs-in 6-1 a hnehna an chan hnu khan match ngaah chak an nei tawh lo (D1, L4). Spurs stadium thar Tottenham Hotspur Stadium-ah hian Man United leh Liverpool ten chak loh an la nei lo bawk.

Kane-a hmunruak

Spurs ṭantuten an goal khung khawl Harry Kane an chan a ni ringawt lo a, season ṭan hma lawkin an chan. Manager thar Ange Postecoglou tan hna a harsat phah sawt dawn.

London club hian match hmasa berah Brentford lakah goal hnih an khung tho a, chutihrualin goal khungtute hi defender Cristian Romero leh Emerson Royal te an ni thung.

Bees lakah hian Richardison-a'n no. 9 hna a chelh a, Brazilian striker hi Son Heung-min, James Maddison leh Dejan Kulusevski ten an thlawp. United lam tan Kane awm loh vanga ngaih ṭhatna ngawt chi a ni lo.

Chutihrualin Spurs hian goal hnih an chhuah avangin point khat chauh an la hlawh chhuak a, tlarhnunga rinrawl Cristian Romero chu a dinhmun a chiang lo.

Fraser Forster inhliam vangin a la inlan thei dawn lo a, Bees hmachhawn ṭumin Hugo Lloris aiah Guglielmo Vicario-a'n bul a ṭan zawk. Postecoglou-a'n Empoli aṭanga lakluh Vicario a rin nawn leh a rinawm.

United ve thung

Man United-in Wolves an hneh ṭumin player thar Rasmus Hojlund an chhawr thei lo a, Danish striker hi Spurs lakah pawh a dinhmun a la chiang lo.

Wolves laka bench-a ṭhu Anthony Martial pawh a ṭul dan a zira chhawr theih a ni tawh dawn. Erik Ten Hag-a buaina ber chu no. 9 a ni a, striker thlawptu tur erawh a ngah.

Ducth manager hian Martial a ring ngam lo a nih chuan Marcus Rashford bawkin bul a ṭan a ṭul ang. Midfield-ah player thar Mason Mount-a'n beisei a la pha lo zel a, Chelsea aṭanga Old Trafford pantu Mount erawh rin chhunzawm zel a ni ang.

Season liam taa captain Harry Maguire-a'n Old Trafford chhuahsan aiin khelhna hmun chuh tura cham a thlang a, bul ṭan turin a la inpeih lo thung ang. Goalkeeper André Onana-a'n match hmasa berah goal a chhuah lo a, penalty a chawi teuh thung. Cameroonian keeper hi en bik tur zinga mi a ni.