Rodrigo-a'n hri leng a kai

Leeds United striker Rodrigo chuan Covid-19 a kai tih hmuhchhuah a ni a, natna langsar nei lem lo mah se midang tlawh pawh lo tura khung hran a ni.

Spain international hi Thawhṭanni zana Leicester City an hmachhawn ṭumin a inlan thei lo. Inrinni zana Crystal Palace nen Premier League an khelh hunah pawh a la inlan thei lo ang.

Kum 29 mi Rodrigo chuan, "Kei leh ka chhungten hri kan kai a, vanneihthlak takin hrisel ṭha vek kan nih avangin harsatna kan nei lo," a ti.

October 26 aṭanga November 1 chhung khan Premier League player 1,446 te endik an ni a, an zinga pali ten hri an kai tih hmuhchhuah a ni.

Britain ramah inkharkhipna kalpui leh mek a ni a, infiamna ṭhenkhat chu chawlh tur ni mah se Premier League erawh a hmuna entu awm loin an kaltlangpui ang.