Luis Diaz a inringtawk

Liverpool forward Luis Diaz chuan tlarhma lamah elpui hautak tak tak nei mah se a zam lo tih a sawi a, a theihna tak pholang ngei turin theihtawp a chhuah zel tur thu a sawi bawk.

Season hmasa khan Diaz hi a inhliam a, match 21 chauh a khel. Reds tlarhma lamah Mohamed Salah chu khawihchet thiang lo a ni a, ani bakah hian Darwin Nunez, Coady Gakpo leh Diogo Jota te an awm.

Jurgen Klopp-a'n a hma lamah duhthlan tur a nei nual, tun season Premier League an khelh hmasak berah chuan Diaz hian hmun pawimawh a chang a, a chunga rinna an nghah ang ngeiin Chelsea lakah pawh goal a khung.

Kum 26 mi Diaz chuan, "A nihna tak sawi chuan khel phak tura inelna a nasa hle, hei chu thil ṭha lam a ni. Inkhel bul ṭantu ni tur chuan 100%-a ṭhain kan beih a ngai tihna a ni, kan zavaia theihtawp kan chhuah avangin team tan rah ṭha a chhuah ang.

"Season hmasa khan hun harsa tak ka tawng ve a, tunah chuan engmah harsatna nei loin ka inkhel thei tawh thung. Kan training lai zawng zawng hi coach-in uluk takin min en vek a, kei chuan coach tih lungawi bakah team tana ṭha ber tur thlen ka tum," a ti.

Liverpool hian an match hmasa berah point khat chauh an hmu a, an elpui tur dangten point thum an hmu thung. Zanin dar 7:30 hian Bournemouth an mikhual dawn, hnehna chang chunga point thum hmuh ngei an tum tawh ang.

Diaz chuan, "Anfield-ah kan inkhel dawn, ka tan hun thla eng emaw zat hnua kan khelmuala ka inkhelh lehna tur a ni. Keimahni mual ni mah se Premier League chu awlsam a awm ngai lo, chuvangin Bournemouth lakah thapui kan thawh a ngai dawn," a ti.