Messi tan nomawi a hnai

Lionel Messi chuan Inter Miami tana a nomawi hmasa ber chawi turin match khat a la hmabak. Pathianni zing dar 6:30 hian Nashville nen Leagues Cup final an khel ang.

Leagues Cup hi Major League Soccer (MLS) leh Mexican club-te knockout hmanga an inelna a ni. MLS club pahnih ten nomawi an inchuh dawn a ni, league lama an dinhmun thlir chuan Nashville hi team ṭha zawk an ni.

Eastern Conference table-ah Nashville hi palina an ni mek - Messi awmna Inter Miami erawh a hniam ber (15-na) an ni thung. Mahse, Messi an neih hnuah Miami hi team danglam an ni tawh.

A zawna match 11 chhung chak ni hmel an hmuh loh mek laiin Inter Miami hian Messi an nei thut a, Barcelona captain hlui a inlan hnuah league match la khel leh lo mah se Cup inelna bikah match ruk khel tawhin an la chak vek.

Argentina captain Messi-a'n a club thar tan hian goal kua a khung leh der tawh. Semifinal-a an hneh tak Philadelphia pawh kha table-ah chuan pathumna ni lai an ni, mahse Miami hian 4-1 in an sawp thei - final atan pawh chak tur zawk sawi lawk theih a ni lo.