Bayern-in goal ruk an khung

UEFA Champions League champion lai Bayern Munich-in Thawhlehni zan khan RB Salzburg 6-2 in an sawp.

Bavarians hi chak chiang viauin lang mah se goal luh chhoh danah erawh a awlsam bik lo. Red Bull Arena-ah mualneituin Mergim Berisha hmangin minute lina lekah an khung hmasa zawk.

Robert Lewandowski penalty leh Salzburg defender Rasmus Kristensen-a'n an lama a tih luh zarah Bayern-in first half-ah 2-1 in an lehthal. Salzburg hian Masaya Okugawa hmangin minute 66-naah siphurh an sut a, amaherawhchu champion lai danglamna a lang. 

Bayern defender Jerome Boateng-a'n minute 79-naah a khung a, Salzburg an ṭang zui thei ta lo. Leroy Sane, Lewandowski leh Lucas Hernandez ten goal khat ṭheuh an khung belh.

Salzburg midfielder Dominik Szoboszlai chuan, "Hun tawp dawn thleng khan 2-2 a ni a, football a nih miau avangin a tawp dan a dang thung. Bayern ṭhatzia kan hmu a, 6-2 hi kan pawm a ngai nachungin hetiang result tur hi chu a ni lo," tiin point hlawh chhuak thei an nih thu a sawi.

Bayern manager Hansi Flick chuan, "6-2 a nih avangin chak chiang viau angin kan lang a, chutiang ngawt erawh a ni lo. Football hmuhnawm ti tan chuan a entlak viau ang, amhaerawhchu coach tan chuan thisen a heh hle," tiin an inhnehtawk thu a sawi.