Man City an chak nuam sa

Etihad Stadium-ah Manchester City-in Olympiakos 3-0 in an hneh a, Pep Guardiola hoten Champions League match thum khelhah hnehna an la chang vek

City tan Ferran Torres bakah substitute pahnih Gabriel Jesus leh Joao Cancelo ten goal an khung a, midfielder ṭha mi Kevin de Bruyne-a'n goal khung lo mah se goal hmasa pahnih hi a siamsak a ni.

English club tana chanchin lawmawm chu Jesus a rawn dam hi a ni a, Sergio Aguero la inhliam mah se Brazilian forward hian Argentine striker hmunruak engemaw chen chu a hnawhkhat thei ang.

Pep Guardiola chuan, "Minute 90 chhung inkhel thunun turin kan la ṭha tawk lo a, engtin nge kan tih theih ang tih pawh ka sawi thei lo. Chutihrualin hnehna chang tur chuan goal khung hma a pawimawh," tiin a sawi a, player ṭhenkhatin ngai awh turin hun an la mamawh thu a sawi tel bawk.