India captain Rani kutah World Games Athlete of the Year Award

India hmeichhe hockey team captain Rani Rampal chu World Games Athlete of the Year atan thlan a ni a, he chawimawina hi India hockey player zinga dawng thei hmasa ber a ni.ṭ

Season hmasa khan India nulate hi Rani kaihhruaina hnuaiah FIH Series Finals-ah an champion a, he inelnaah hian Rani chu Player of the Tournament atan thlan a ni. India chu a vawi thum nan Olympic khel turin a tlinpui a, inkhel pawimawha United States an hnehna goal a khung bawk.

Award dawng thei tur hian infiamna peng hrang hrang 25 aṭangin infiammi 25 chu chhawpchhuah an ni a, player chhawp chhuahte hi a duh duh vote theih tura dah niin Rani hian vote tla 705,610 zinga 199,477 hmuin a chung berah a awm.

Rani awmna India team hi tun dinhmunah chuan New Zealand-ah tour neiin an awm mek a, an match hmasa berah 4-0 in chak mah se a vawi hnihnaah 1-0 in an chak lo thung; an match thumna atan February 4 hian Great Britain nen an inkhel leh ang.

India team zingah hian Mizo nula Lalremsiami Hmar pawh a zin leh a, player pawimawh zingah a tel. India hi kumin nipui laia neih tur Olympic atan an tlin tawh avangin an match neih ho hi Olympic atana inbuatsaihna a ni nghal zel.