Kane awm lohna Spurs-in Man United an hneh

Tottenham Hotspur-in manager thar Ange Postecoglou hnuaiah a vawi khat nan hnehna an chang a, an mualah Manchester United 2-0 in an hneh. Spurs tan Pape Matar Sarr-a'n goal a khung a, United defender Lisandro Martínez-a'n an lamah a ti lut bawk.

Inrinni zan inkhelah hian Spurs-in chak an phu a, Harry Kane awm loh hnuah beisei tur a awm tih a pholang. Man United tan erawh lawmna tur a awm meuh lo a, inhnemna tur an zawng a nih chuan match hnih khelhah season liam ta aiin point an hmu hnem zawk.

Spurs thar

Tottenham-in inkhelh ṭan hmain club chairman Daniel Levy leh neitu ENIC duh lohna an au chhuahpui a, inkhelh an ṭan chiah hnuah erawh an club hmangaih tan thawm an nei ring hle.

Spurs tan lawmna tur a awm nghal. Jose Mourinho leh Antonio Conte hun laia club lian hmachhawn a, goal venhim hna thawk nghal ngawt an kha an ni tawh lo. Ṭan phat aṭangin passing game an lantir a, mual sir aṭanga goal nawrin United wing back an ti mualpho.

First half-ah goal a lut lo a, goal chance erawh a awm. Dejan Kulusevski-a'n a hmawr a bawk ṭha ṭhin lo a, Pedro Porro-a'n ball petin crossbar a per hnuah Pape Matar Sarr-a'n pet lehnghalin Luke Shaw a per hnuah goal ban a per.

Second half-ah goal a lut hma a, minute 49-naah Kulusevski cross chu defender-ten an dan per hnuah Sarr-a'n chiang zetin a pet goal. Luke Shaw a tlan chhuah tam avangin United tlarhnung vei lam a pawp nasa hle.

Spurs midfielder pathum Sarr, James Maddison leh Yves Bissouma te an hmuhnawm a, mual lai thununtu an ni. Minute 83-naah substitute Ivan Perisic-a thawhrah chu Ben Davies-a'n khawih fuh chiang lo mah se United defender Martinez tan buaina tham a tling - an lamah a tihluh phah. Tottenham-in an phu angin hnehna an chang.

United an bil

Man United-in nipui bazarah sum an hmang tam a, khelmualah a rah a la lang tawk lo. An mamawh ber Rasmus Hojlund chu hliam vangin matchday squad-ah pawh a la awm lo a, Marcus Rashford-a'n Wolves leh Spurs lakah no. 9 hna a luah hneh lo.

Chutihrualin United hi khel chhe lailet dêr an ni bik lo a; Alejandro Garnacho ball pet chu Spurs defender Cristian Romero-a'n a kutin dang mah se penalty pek an ni lo. Captain Bruno Fernandes a khel chhe fal a, ball a pet sual nasat bakah hnai tak aṭangin vengtu nei lo chungin a tauh lut lo.

Goal khat leka Spurs-in hma an hruai laiin Garnacho-a'n goal ban a pet per bawk. Goalkeeper Andre Onana-a'n goal an chhuah danah mawh a phur lo a, a ball pet thiam zia a lantir. First half-a hla tak aṭanga mual vei lama ball a thawn phei chu midfielder ṭha bik pet atana mawi a ni.

Amaherawhchu United-in midfield-ah an ngam miau lo a, hei vang hian an goal bawh pawh a na tawk thei lo. Mason Mount, Fernandes leh Casemiro te an la inkawp rem tawk lo a, league match pahnih aṭanga thlirin Ten Hag-a'n hmabak a ngah hle.