Hmeichhe football roreltu SPAIN

FIFA Women's World Cup 2023 final chu nimin khan khelh zawh a ni ta a, Spain tluk phak an awm lo - nimin khan England chu La Roja hian 1-0 in an hneh a, an vawi thum World Cup khelhnaah nomawi an chawi nghal!

Spain tan captain Olga Carmona chuan minute 29-naah goal hmahruai a khung a, England-in hun tawp thlenga a chhanletna tur an neih loh avangin Spanish nulaten World Cup nomawi an chawi.

La Roja nulaten minute 29-naah goal khung belh theihna remchang an nei hial - penalty an hlawh chhuak a, mahse, Jennifer Hermoso chuan penalty hi goal-ah a chantir thei lo zawk.

English nulaten hun tawp lamah Spain hi na takin nawr mah se, a pawimawh ber goal an hlawh chhuak thei lo a, a tawpah chuan nikum lawka team talbuai em em Spain khan world champion an ni ta - Spain hi Under-17, U20 leh senior hmeichhe team-ah world champion an ni vek!

A hmuhnawm

Stadium Australia, Sydney khawpuia inkhelah world champion nih tumin Lionesses an inlan a, England hian kum 1966-a mipa team-in World Cup an chawi hnuah nomawi an la chawi loh avangin an ram pumin thil ropui a thlen beiseiin an thlir.

Mahse, group stage-a Japan-in 4-0 ngawta an sawp Spain nulaten an ball thiamna hmangin English nulate an chhaih mangang a, inkhel an thunun - minute 29-naah Lucy Bronze a chesual zui a, a ball hloh kal zel aṭangin Real Madrid full back Carmona chuan goal hmahruai a khung.

England-in si phurh sut ngei an tum a, World Cup 2019 final-a Netherlands tlawm puitu coach Sarina Wiegman chuan a zawna World Cup final-a tlawm duh loin Lauren James leh Chloe Kelly te bench aṭangin a luhtir a, mahse, an beisei danglamna an thlen thei lo.

Barcelona midfielder Keira Walsh handball vangin England hian penalty an chawi zawk a, mahse, Hermoso pet chu goalkeeper Mary Earps chuan a dansak - England phur sawt mah se awmze neiin Spain an nawr thei lo a, a tawpah chak phu zawk an champion.

Coach lawmna

Nikum khan Spain hmeichhe team-a player 15 lai chuan an coach Jorge Vilda hnuaia khelh an duh tawh lo a, an lungawi lohna chu Spanish Football Federation (RFEF) hnenah hial thlenin, Vilda chu an ban loh chuan ram tana an khelh tawh loh tur thu an sawi.

Player 15-te hian Vilda chu a training neihpui dan, game thlir dan leh a ruahmanna hrang hrangte chu an sawisel. Mahse, RFEF-in an coach an hrechiang tawkah an ngai a, player 15-te chuan ngaihdam an dil a nih loh chuan ram tan an inlan theih loh tur thu an lo hrilh let hlauh.

Vilda hian player lungawi lo aṭangin forward Mariona Caldentey, midfielder Aitana Bonmati leh defender Ona Batlle te chu tun World Cup-ah hian a hruai a, hmanni lawka an rin zawh loh coach kaihhruaina hnuaiah world champion medal an awrh ta.

Vilda hian, "Ka thil tawn ang hi tumahin an tawn ve ka duh lo," tih hialin a player-te ngeiin an duh lohna chu na a tih thu a sawi a, mahse, tumruhna leh huaisenna nena a beih rah chu nizan khan a tel ta - tuin nge maw lawmpui lo ang le?

Mimal Lawmman
Golden Ball : Aitana Bonmati, Spain
Golden Glove : Mary Earps, England
Best Young Player : Salma Paralluelo, Spain
Golden Boot : Hinata Miyazawa, Japan (5 goals)