Messi hoin Inter Miami an champion

Inter Miami chuan player ṭha bik Lionel Messi an nei a, an neih phak loh tura ngaih an nei ta - Major League Soccer (MLS) club hian a vawi khat nan nomawi an chawi a, nimin zing khan mellung pawimawh bik an phun.

MLS leh Mexican club-te knockout hmanga inelna Leagues Cup final-ah Inter Miami leh Nashville SC te hun pangngaiah 1-1 in an inhnehtawk a, penalty an pet hnuah Messi awmna Miami hi 10-9 in an chak.

Major League Soccer league kal laiah Inter Miami hi an che ṭha lo hle a, team 15 awmna Eastern Conference table-ah a hniam ber an ni. Messi an neih hma an match hnuhnung 11-ah chak ni hmel an hmu miah lo.

Mahse, Messi bakah Barcelona tana a khelhpui tawh ṭhin Jordi Alba leh Sergio Busquets te an neih chinah erawh thawnthu a danglam vek. Leagues Cup an khelh zawng zawngah an chak vek a ni.

Kum 2020 a din chauh Inter Miami tan nomawi hmasa ber a ni a, an tan chuan theihnghilh ngai tawh loh tur a ni ngei ang. US Open Cup semifinal an khel thei zui dawn - Ningani zingah Cincinnati nen an intawng leh ang.

Club neitu zinga mi David Beckham chuan, "Lemchan hmuhnawm tak, thawnthu ziaktu in a duh ang tlapa thawnthu a phuah ang mai hi a ni. Player ten a khel ṭha em em a, an theihtawp takmeuh an chhuah," tiin a sawi.

England captain hlui Beckham hian Messi an lalut thei chu a duhthusam tih puitlinna pakhat a nih thu a lo sawi tawh bawk, club neitu tan chuan thawk lehkhata danglamna a thlen dan ngaihtuahin a lawmawm zual khawp ang.