Highlander-in quarterfinal lut

India rama football inelna ngaihhlut hlawh Durand Cup pawh a hmawr bawk a hnai zel a, NorthEast United chuan nimin khan Downtown Heroes chu 3-1 a hnehin quarterfinal an lut.

Srinagar club Downtown tan Parvaj chuan goal hmahruai khung mah se, Highlander hian Ibson Melo, Romain Philippoteaux leh Pragyan Gogoi hmangin an chhanglet a, 3-1 in NorthEast an chak daih.

Highlander hian group D hmahruaitu FC Goa phak thei tawh lo mah se, pahnihna ti ṭha pahnih zingah an tel chiang a, hei vang hian a thiam pariat zinga tel turin an tlang.

Zirtawpni zan khan Bengaluru leh Kerala Blasters te 2-2 in an inhnehtawk a, Bangalore club tan Edmund Lalrindika chuan goal a khung - Ashish Jha chuan a khung ve bawk. Mahse, Blasters tan Justine Ojoka Emmanuel leh Mohammed Aimen ten khung ve thoin, 2-2 in inkhel a tawp a, club pahnih tan group stage-ah zinkawng a tawp ve ve.

Inrinni khan Mumbai City chuan 4-0 a Indian Navy hnehin quarterfinal an lut bawk a, Jorge Pereyra Díaz, Greg Stewart, Gurkirat Singh leh Nathan Rodrigues ten goal khat ṭheuh an khung.

Group F inkhelah Bodoland FC chuan 2-1 in Odisha an hneh a, team pahnih hi an tla ve ve tawh - ISL club tan Pungte Lapung chuan goal hmahruai khung mah se, Maneshwar Mushahary leh Zacharie Mbenda hmangin Bodoland chuan an chhanglet a, 2-1 in an chak.