City tan Magpies an la nau hret
Newcastle United-in Premier League club lian zinga chhiar tel an phu ve tawk tawh, tih pholan tum mahse, an tan Manchester City zin chau leh squad kim lo pawh an la ṭha lutuk hret a, an mikhualna ramah 1-0 in an tlawm.
City tan Julian Alvarez chuan inkhela goal awmchhun a khung a, City tana goal khung ṭhang Erling Haaland erawhin chance nei mah se a hun ṭha neih a chhawr thei lo thung.
UEFA Super Cup nomawi chawi hlim City-in league match hnih an khelhah a zawnin hnehna an chang leh ta der a, match hmasa bera 5-1 a Aston Villa sawptu Newcastle tan erawh hei hi 'darthlalang' a ni.
Magpies hian league match an khelh leh hmasak berah Liverpool an mikhual dawn a, City laka an khelh dan anga an khel leh a nih ngat chuan hrem lohin an awm lo ang.
KDB aiah Foden
City tan malpui hliam vangin midfielder Kevin de Bruyne chu thla ruk vel zet a chawlh a ṭul dawn a, Belgian midfielder tel lo chuan City hi an zuamawm sawt - mahse, City tan a hun takah Phil Foden a inlar.
English midfielder che vel a hmuhnawm takzet - ball awmna a hria a, petchhuah hun a hre êm êm a, fing taka hmun awl insiam leh tlan dan a thiam êm êm bawk. A tawi zawnga sawi chuan, Foden-a'n KDB hmun ruak a hnawh khat a, a hna a tlin.
Minute 31-naah City hian Alvarez hmangin inkhela goal awmchhun an khung a, Argentine forward finishing a tawih tluk zetin Foden-a ball pek a fing a, player thiam bik ke aṭanga chhuak a ni.
Second half-ah City hian chance an ngah zawk a, mahse, an goal khung khawl Haaland-a vanneih zan a ni lo. Norwegian striker hian goal khungna remchang a nei fo a, mahse, uiawm takin a hlah leh ṭhin.
An la sang hret
City-in KDB an chhawr theih loh bakah Bernardo Silva chu damlohna avangin a inlan thei lo a, August 12 zana Burnley an hneh hnu lawk, August 16 zanah UEFA Super Cup an khel zui a, tunah league match an khel leh!
KDB leh Silva theihna thlirin, anni pahnih awm lo ringawt pawh chhuanlam a tling a, hemi belhchhah turin fixture tawt lutuk avangin City an chau takzet - heti chung hian Magpies lamin harsatna an thlen thei meuh lo.
Magpies hian ṭum dang ang thoin tharum hmangin inkhel thunun an tum a, a bik takin Foden leh Rodri an dim lo fal - mahse, City an thiam miau a, Eddie Howe-a naute tan dan an harsa.
Newcastle hian City tlarhnung an rum ṭhaih meuh lo bawk - target-a an shot hmasa ber nei turin minute 70-na an nghah thlen a ngai a, chu pawh bench aṭanga luhtir Harvey Barnes-a'n box pawn aṭanga Ederson a enchhinna chu a ni.
Beisei phak lo
Magpies hian City squad kim lo leh chau an la chai tawk lo, ti pawhin a sawi theih a, Champions League khel tur club tan Europe club ṭha ber berte elpui turin insiamṭhat a ngai.
Magpies boss Howe chuan, "A bul ṭanna hi chu a harsa dawn tih kan hre sa a, chutihrual chuan khawiah pawh hnehna kan chang thei tih hre chungin kan inringtawk hle. Mahse, chumi tur chuan kan ṭhat dan bera khelh zel a ngai a, kan ti si lo a ni," a ti.
City boss Pep Guardiola chuan, "Kan khelh dan avanga ka lawmzia hi thuin ka sawifiah thiam lo. Kan khel ṭha takzet a ni," a ti a, a lawmthu a sawi.
Premier League champion hian an match khelh leh tur hmasa berah Sheffield United an lenchilh dawn a, fixture tawt vangin Pep phun viau mah se, fixture hautak an nei lawk dawn lo.