Player kim lo Reds an chak

Pound maktaduai 35 man, Liverpool midfielder thar Alexis Mac Allister chuan Anfield-a a match hmasa berah red card a hmu a, mahse, Argentine midfielder hnawhchhuah a nih hian Liverpool-in 2-1 in Bournemouth lakah hma an hruai tawh a, an kim loh hnuah goal khung belhin, 3-1 in an chak.

Bournemouth tan Antoine Semenyo chuan minute thumna lekah goal khung mah se, Liverpool-in an chhanglet vat. Minute 28-na lekah Luis Diaz chuan player class sang a ni tih pholangin, goal mawi bik a khung a, 1-1 a ni.

Minute 36-naah khel ṭha êm êm mai Dominik Szoboszlai chu Joe Rothwell chuan box chhungah a titlu a, Cherries lamin penalty pekna turah nem hretin ngai mah se referee-in a ngaihdan a ṭawmpui lo.

Salah penalty pet chu keeper Neto-a'n dang mah se, a per lehlam chu Salah hian a khung ta tho - Liverpool tana goal 187 a khungna chiah a ni a, Reds tana goal khung tam pangana ni turin Steven Gerrard (186 goals) chu a lehpel.

Liverpool midfielder Allister chu Ryan Christie laka a chet dan a hlauhawm lutuk hretah ngaiin referee-in a hnawt chhuak a, mahse, Liverpool an talbuai phah lo. An nawr chhunzawm reng a, a tawpah goal an khung belh ta nge nge.

Minute 62-naah Szoboszlai-a shot chu Neto chuan dang mah se, a per lehlam hi Diogo Jota chuan goal-ah a chantir a, hun tawp thlenga goal dang lut loin Liverpool an chak.

Liverpool tan Japan midfielder Wataru Endo chu bench aṭanga lutin a match hmasa ber a khel a, £19mtd man hi a khel ṭha pangngai viau - mahse, Liverpool hi Mac Allister hnawhchhuah a nih avangin an lawm lo.

Reds manager Jurgen Klopp chuan, "Thutlukna dik lo a ni a, kha kha red card tur a ni lo. Tihsual palh a ni a, minute 40 chhunga player 10-a kan khel kha hremna a ni tawh. Thuneitute kan biak a ṭul ang," a ti a, dan ang chuan Mac Allister hi match thum hrem tur a ni.

Hetihlai hian penalty an chawi danah mikhual team an lawm bik lo a, Bournemouth boss Andoni Iraola chuan, "Ka ngaihdanah chuan a nem mah mah a ni," a ti - referee thutluknaah team pahnih an lawm lo ve ve!