Germany-ah pawh Kane a la ngai reng

Premier League-a goal khungtu ropui Harry Kane-a'n England chhuahsana Germany a pan hnuah pawh a hna ngai a la thawk reng a, England captain Bayern Munich tana Bundesliga match hmasa berah goal a khung nghal. Bavarians hian August 18, Zirtawpni zan khan Werder Bremen 4-0 in an sawp a, Kane-a'n assist leh goal a neih avangin club thar tan bul a ṭan ṭha hle.

Weserstadion-ah Kane-a'n a theihna lantir turin hun rei a mamawh lo a, minute lina lekah Leroy Sane tan ball ṭha pein Manchester City forward hlui hian goal hmahruai a khung.

Kane hi Bayern goal nawrna kawngah a pawimawh nghal a, minute 15-naa Jamal Musiala tana an tihpial sak zeuhte chu player naran tih theih loh a ni. England captain hian Bayern-ah hun rei a la hmang lo a, a khelhpuite nena an inhriat chian hunah chuan a hlauhawm lehzual dawn.

Bayern hian player tlan chak leh theihna nei sang an kawl hnem a, hei hi Kane-a'n hlawkpui dawn. Minute 74-naah 'road runner' hminglem an pek Alphonso Davies-a'n mual vei lam aṭangin Kane a tan ball ṭha a pe a, English striker hian ṭha zetin a khung.

Kane hi hliam tenau vanga lakchhuah a nih hnuah Thomas Muller, Mathys Tel leh Eric Maxim Choupo-Moting te an lut. Minute 90-naah Sane-a'n a khung belh a, injury time-ah Tel-a'n a khung belh leh bawk. Muller hi Bayern tana Bundesliga season 16 khel thei hmasa ber a ni.

Bundesliga-a champion nawn turin Bayern an ṭha tawk tih a lang a, Thomas Tuchel-a hoten DFL Supercup-ah RB Leipzig hneh lo mah se an insiamṭha nghal. Leipzig erawh Bayer Leverkusen lakah 3-2 in an tlawm.

Bayern elpui leh thei ber tura ngaih Borussia Dortmund-in point thum nen bul an ṭan a, FC Cologne chu 1-0 in an hneh. Dortmund tan hian Bayern aṭanga an lakluh Marcel Sabitzer-a'n bul a ṭan nghal.