Tumah number 1 an awm lo - Arteta

Arsenal manager Mikel Arteta chuan a player zingah tumah khel tur chiangsa an awm bik lo tih a sawi a, player zawng zawngin khelhna hmun chang turin an theihtawp an chhuah vek a ngai tihna a ni.

Gunners hian tun hnai khan goalkeeper David Raya chu loan hmangin an hawh, an keeper neihsa Aaron Ramsdale nen an inel dawn a, a nek chhuak dawn em tih chu hunin a la hril ang.

Kum 25 mi Ramsdale hian season hmasa khan clean sheet vawi 14 a nei, a club Arsenal hi Premier League-ah pahnihna a nih pui. England tan khel tura kohna pawh a dawng hial, mahse Arteta hian duhkhawp lohna lai a nei tih a hriat theih.

Spanish manager Ateta chuan, "Result ṭha nei tur chuan khelmual leh a chhehvel boruak ṭha a pawimawh. Ni tin maiin 100%-a beih a ngai a nih chuan kan theihna leh thiamna pawh a pung ngei ang.

"Goal keeper ṭha tak pahnih kan nei a ni ringawt lo. Winger, midfielder leh striker pawh ṭha tak tak kan nei a, tumah number 1 an awm bik lo," tiin a sawi a, a player tharte pawh inlan phak tur chuan an beih ve viau a ngai dawn tihna a ni.

Arteta naute hian tun season an league match pahnihna atan, zanin dar 12:30 hian Crystal Palace an lenchilh ang.