Bellingham 'show' Spain-in an hmu zel

English midfielder Jude Bellingham tan Spain-a tlangnel turin hun tam a ngai lo - La Liga match hnih a khelhnaah goal a khung leh ta a, tun ṭum chu goal hnih a khung bawk!

Inrinni zan khan La Liga inkhelah Real Madrid hian Almeria chu 3-1 in an hneh a, Bellingham chuan goal hnih a khung bakah Vinicius Junior chuan goal khat a thawh ve bawk.

Real hian league match hnih an khelhah hnehna an la chang ve ve. Nizan khan Real elpui Barcelona leh Atletico Madrid te an inlan a, he thu buatsaih a nih lai hian an result kan hre hman lo ve ve.

Inrinni zan inkhel dangah Real Sociedad chuan Ander Barrenetxea goal an chakpui dawn emaw tih hnuah, Celta Vigo tan Oscar Mingueza chuan hun pek belhah si phurh sutin, 1-1 in an ṭin a, Athletic Bilbao chuan Iñaki Williams leh Gorka Guruzeta goal hmangin Osasuna chu 2-0 in an hneh bawk.

Barakhaih

Real-in an match hmasa zawkah harsatna nei loin Bilbao an hneh a, match hnihnaah Almería an lenchilh - Carlo Ancelotti naute hi harsatna tawk loa chak mai tura ngaih an ni.

Mahse, Almeria khelmualah rin loh angin thil a thleng hmasa zawk a, minute thumna lekah Sergio Arribas chuan Almeria tan goal hmahruai a tauh lut - Real ṭantute an hawihai.

Real talbuai chhung erawh a rei lo. Minute 19-naah player ṭhangduang Bellingham chuan innghahna tlak a ni, tih pholangin si phurh sutna goal a khung a, minute 60-naah a belhchhah leh bawk.

Madrid khaw club an hawikir tawh lo. Minute 73-naah Vinicius Junior inlarin, Real goal thumna a khung ve leh a, hei pawh Bellingham siamsak tho a ni!

Real number 5

France player ropui Zinedine Zidane khan Real tana a khelh laiin number 5 a ha ṭhin a, he number hi Bellingham pawhin Spanish club-ah hian a ha - mawhphurhna leh pressure tam tak a keng tel tih a hai lo.

Mahse, tun dinhmunah chuan Bellingham hian number 5 hmingṭhatna a la chhawm nung rih viau. Bilbao laka goal a khung hnuin Almeria lakah a khung leh ta a, Wesley Sneijder (2007) hnua Real tana match hmasa pahniha goal thum khung leh thei hmasa ber a ni.

A goal hmasa zawk khung turin Bellingham hi a hunah tak, a hmunah tak a lo awm a, a goal hnihna turin Toni Kroos-a siamsak chu a tauh lut bawk - Vinicius khung tur a siamsak zui a, Real goal thum a thawk chhuak vek.

Real hian pound maktaduai 88.5-in Bellingham hi an la lut a, a khelh ṭhat dan a zira £115mtd thlenga a man hi sang chho thei tur a ni - tuna a khelh dan aṭanga teh chuan Real hian an pek ngei a ngaiin a rinawm.