Brighton an thiam

Brighton & Hove Albion-in player pawimawh pathum Alexis Mac Allister, Moises Caicedo leh Robert Sánchez an chan chungin khelmualah buaina an tawk lo. August 19, Inrinni zan khan Brighton hian Molineux Stadium-ah Wolverhampton chu entu 31,317 hmaah 4-1 in an sawp.

Season liam ta khan Brighton hi beisei phak bakin an che ṭha a, Roberto De Zerbi hnuaiah an che ṭha chhuzawm zel. Wolves hian match hmasa berah Manchester United an hmachhawn a, Old Trafford-ah Erik ten Hag-a hote nen inel tawk mah se Brighton erawh an el tawk lo.

Brighton hian team game an khel ṭhin a, goal hmahruai erawh mimal thawhrah a ni thung. Kaoru Mitoma chuan minute 15-naah ṭha zetin a khalh lut a, goal ropui a khung.

Second half ṭan aṭanga minute 10 chhungin Brighton-in goal thum an khung belh a, team goal vek a ni. Solly March-a'n goal hnih a khung bakah wing back ṭha mi Pervis Estupinan-a'n a khung bawk.

Hwang Hee-chan-a'n Wolves tan goal khung ve bawk mah se chak phu zawk Brighton 4-1 in an chak. Seagulls hian match hmasa berah Luton Town 4-1 in an sawp tawh bawk a, league hmahruaitu an ni mek.