Champion lai tan Osimhen

Serie A champion lai Napoli chuan Inrinni zan khan season thar an league match hmasa ber an khel a, striker ṭha Victor Osimhen-a'n goal hnih khung leh nghalin Frosinone mualah Naples club 3-1 in an chak.

Season hmasa khan Osimhen hian Serie A goal 26 khungin a club hi kum 1990 hnua a vawi khat nan a champion pui, nipui bazarah club lian dangten lakluh duh mah se Napoli lamin a man tan uchuak takin an chhiar tlat a, an la chelh thei.

Mualneitu Frosinone lamin minute sarihna lekah Abdou Harroui-a penalty hmangin hma hruai mah se, mikhual lamin Matteo Politano hmanga an sut hnuah Osimhen-a'n goal hnih a khung belhchhah.

Inkhel dangah Inter Milan pawhin Lautaro Martinez-a goal hnih hmangin Monza chu 2-0 in an hneh. Inter leh Napoli te hi nomawi inchuh thei tura ngaih an ni a, an striker pahnih Martinez leh Osimhen te pawh goal khung hnem zawk nih tumin an inel bawk ang.

Juventes erawhin nizan khan an match hmasa ber an khel ve thung. Old Lady hi season hmasa khan point 10 paihsak an ni a, kuminah Champions League an khel dawn lo. An player neih dan thlirin Serie A-ah erawh Napoli, Inter Milan leh AC Milan an elphak ngei a rinawm.