Swiatek hnehtu Gauff

Hmeichhe tennis world number 1 Iga Swiatek chuan Cincinnati Open final a lut phak lo, semifinal-ah tleirawl beiseiawm Coco Gauff lakah 7-6(2), 3-6, 6-4 in a chak lo zawkah a ṭang.

American player Gauff hian a khel ṭha hle a, a bik takin a service a nain a hlauhawm bawk. Nizan khan Karolina Muchova nen nomawi an inchuh zui a, result kan hre hman lo. Czech Republic nula Muchova hian semifinal lehlamah world number 2 Aryna Sabalenka 6-7(4), 6-3, 6-2 in a hneh ve thung a ni.

Kum 16 mi Gauff chuan, "World number 1 Swiatek hi player ṭha tak a ni tih ka hria, mahse ani hi ka hneh ve thei a ni tih ka inhrilh nawn mawlh mawlh a, set ka hloh hnu pawh khan ka beidawng lo," a ti.

Mipa singles lamah chuan world number 1 Carlos Alcaraz leh number 1 Novak Djokovic ten final an lut a, anni pahnih pawh hian nizan zanlai pelh tawh khan final an khel ve bawk.

Cincinnati Open hi US Open inbuatsaihna zinga langsar leh ngaihhlut hlawh a ni a, hard court-ah an khel. Tun season chhunga Grand Slam hnuhnung ber US Open chu August 27 aṭangin New York khawpuiah khelh a ni ang.