Mancini thlaktu Spalletti

Italy chuan an coach thar atan Luciano Spalletti an ruat tih an puang. Season hmasa Serie A champion coach hian Roberto Mancini hmunruak a luah dawn tihna a ni.

Kum 64 mi Spalletti hian season hmasa khan ropui takin Napoli a enkawl a, season tawpah a hna a chawlhsan. A chawlh dawn khan taksa leh rilru hahdam a mamawh thu sawi mah se, tunah chuan chona a hmachhawn leh dawn.

August 13 khan Manchester City manager hlui Mancini chuan Azzurri enkawl hna a bansan thung a, a ban chhan hi chiang taka sawi a ni lo. Amah thalktu Spalletti hian September 1 aṭangin hna a thawk ṭan ang.

Italian Football Federation (FIGC) president Gabriele Gravina chuan, "Kan ram team hian coach ṭha leh ropui tak a mamawh a, kan sawmna te min pawmsak avangin Spalletti chungah kan lawm hle," a ti.

Italy hian Euro 2018 nomawi chawi mah se, khawvel huap inelna lian FIFA World Cup-ah a zawnin an tel phak lo. Tuna Spalletti hna hmasa tur erawh Euro 2024 qualifier a ni dawn.

September thla hian Azzurri hian North Macedonia leh Ukraine te an hmachhawn ang.