Mizo Shuttler-ten gold panga an hlawh chhuak

Yonex-Sunrise North East Zone Interstate Badminton Championship 2023 neih zawh takah Mizoram aiawha inlan Mizo shuttler-te an che ṭha takzet a, gold medal panga, silver medal pahnih leh bronze medal paruk an hlawh chhuak.

August 16 aṭanga neih ṭan inelna hi Auigust 19 khan ṭiakin, inelna hi Arunachal State Badminton Association (ASBA) chuan thlengin, India hmarchhak state hrang hrangte inelna niin, team leh open-ah inelna hi neih a ni.

Junior Category bikah gold medal lak theihna paruk zinga pangaah Mizo shuttler-ten gold an la a, pakhatah silver medal an vaw chhuak bawk.

Itanagar, Arunachal Pradesh-a neih inelnaah hian, Under-19 boy's singles final-ah Mizo final kan hmu - seeded no. 2 H. Lalṭhazuala leh seeded no. 4 Saitluangpuia Sailo te an intawng a, Mizoram champion H. Lalṭhazuala, Chanmari West hian 21-16, 21-13 in hnehna a chang. Ramhlun Venglai rawlthar Saitluangpuia hian semifinal-ah seeded no.1 Himanash Sekhar Das hneh mah se, final-ah a vanduai.

Senior lamah Joseph VL Ringngheta leh Laldingpuii te ṭang dun chuan mixed doubles-ah gold medal an la - Jojo-a, Kulikawn leh Dingpuii, Mission Veng te hian seeded no 1 ni chungin inelna an hmachhawn a, final-ah Manipur player L. Unikumar Singh leh Naorem Purnima Devi te ṭang dun chu 21-13, 17-21, 21-18 in, deciding game-ah an hneh a ni.

C. Lalramzauva chuan U19 boy’s doubles leh U19 mixed doubles-ah gold medal a hlawh chhuak ve ve. Durtlang rawlthar Ramzauva hian U19 boy's doubles-ah Serchhip rawlthar Lalnuntluanga nen ṭang dunin, Lobsang Choidrup leh Lobsang C. Sherdang te ṭang dun chu 21-9, 21-15 in harsatna nei loin an hneh.

U19 XD category-ah Serchhip tleirawl Lalrempuii nen ṭang dunin, final-ah Udayan Saikia leh Anushree Mahanta te inkawp chu 21-17, 21-10 in, straight set bawk in an hneh leh a ni - Rempuii pawh hian gold medal pahnih a hawn.

Rempuii hian U19 girls doubles-ah Abigail Lalṭhazuali, Saron Veng chu ṭanpuiin, seeded no. 1 an ni a, final thleng an tumpuite straight set vekin an hneh thei - final-ah hian Manipur player Konsam Gunjan Devi leh Sananu Meisnam te chu 21-11, 21-15 in, hahdam takin an hneh.

Hetihlai hian unseeded ni chunga U19 girl's singles final thleng thei Lalrinkimi chuan silver-ah lungawi a zir a ṭul a, semifinal-ah seeded no. 3 Montily Pul hneh mah se, final-ah seeded no. 2 Shantipriya Hazarika chu 15-21, 19-21 in a hneh zo ta lo. He category-ah hian Abigail-i chuan bronze a la bawk a, ani hian semifinal-ah champion ta Shantipriya hi 13-21, 19-21 in a hneh lo.

Women’s singles-ah Ramngaihzuali, Ramhlun South chuan semifinal lut mah se seeded no. 1 leh champion zui ta Ksh Maheshwari hneh loin, bronze a dawng a, Men’s doubles-ah Lalrinawma, Bungkawn leh Laldintluanga Tlau, Republic Vengthlang te ṭang dun chuan bronze rawn hawnin, Women’s doubles-ah Lalvenhimi, Thakthing leh Zothansangi, Saron Veng te chuan bronze an la bawk. Team inelna lamah Mizoram Junior Boy’s team leh Girl’s team te chuan bronze medal an dawng ve ve bawk.