MPL10 Fixtures a chhuak: September chhungin phase 1 khelh zawh a ni dawn

Mizoram Premier League Season 10 fixtures chu nimin khan MPL Board-in a tichhuak a; August 25, Zirtawpni aṭangin khelh ṭan a ni dawn. Season liam ta khan September thlaah inelna ṭan chauh a ni a, kuminah erawh kum tawpah inthlanpui a awm dawn avangin inelna hi ṭan hma a ni.

MPL-ah hian team pariatte hi vawi hnih ṭheuh an inkhel kual a, hemi zawh hian semifinal leh final khelh tur a la awm. Fixtures tihchhuah chin hi phase 1 chauh a ni a, ruahman danin September 26, Thawhṭanniah khelh zawh a ni ang. Inelna pumpui pawh hi inthlanpui hmaa zawh hman vek tum a ni.

Lammual an hnuchhawn

Mizoram 'Wembley Stadium' tih hiala sawi ṭhin Lammualah MPL10 khelh a ni dawn lo a, phase 1 bik hi RG Stadium leh 1st Bn MAP Ground-ah te khelh a ni dawn. Round 6 hi Kolasib-ah khelh tur a ni bawk ang.

Kum 10 chuang liam ta khan MPL hi khelh ṭan a ni a; July 13, 2012 khan Lammualah MPL Playoff khelh ṭan a ni. Hetihlai hi chuan Lammual hi ground ṭha ber a ni a, a awmna hmun a ṭhat bawk avangin MPL hlutna pawh a san phah hle.

Inelna tak erawh October 24, 2012-ah khelh ṭan a ni a, hetihlai hian inkhelh enna siam zawh a la ni lo. MPL2 leh MPL3-ah enna ṭha zawk a awm tawh a, inelna hlutna pawh a san phah sawt bawk.

Lammual hi football pual a nih avangin mipui tan enna a hnai a, inkhel a hmuhnawm bik. Amaherawhchu kum 10 a ral meuh chuan Lammuala artificial turf chu hman tlak a ni ta meuh lo a, Mizo football inpui tia sawi theih 'Lammual' chu MPL khelh nan pawh hman tlak a ni ta lo.

Mizoram hmun hrang hrangah artificial turf thar phah a ni a, football ngainatute tan chuan a hlu hle. Chutihrualin artificial turf phahna sa hi enkawl uluk a ṭul a, Lammual ngei pawh hi I League khelhna tlak law lawa chei ṭhat atan a duhawm hle a ni.

Ground thar

Season liam ta khan MPL hi RG Stadium-ah khelh a ni tawh a, chhun pachanga Mualpuia inkhelh hi player tan a harsa. Floodlight awm tawh mah se zan inkhelah sum sen a tam avangin inelna buatsaihtu lam tan zan lama inelna buatsaih hi a hmawr bawkna a nih ngawt loh chuan tlin theih a ni lo.

Chutihrualin MPL Board lam chuan tlin china ruahmanna an siam a ngai a, round hmasa pahnih hi RG Stadium-ah khelh a ni ang. I Day Football neih zawh tak kha RG Stadium-ah khelh a nih bawk avangin club tan harsatna a awm a rinawm loh.

Phase 1-a round pali dang hi ground thar 1st MAP Ground-ah khelh a ni dawn a, hei hian inelna a tingaihnawm sawt ang. 1st MAP Ground hi a tet hret avangin inkhel result thlengin a nghawng thei dawn a, team nem zawk tan team ṭha zawk point chhuhsakna remchang a ni thei ang.

MPL10 Round 1-na bik

August 25, Zirtawpnia MPL match hmasa berah champion lai Chawnpui FC leh kai thar Project Veng FC te an inkhel dawn. I Day Football-ah khan team pahnih hi an inkhel tawh a, Kolasib club hi chhungnung zawk mah se injury time-a Peter Lalrinhlua goal hmangin Chawnpui an chak. Tun ṭuma an inkhel lehnghal tur hi en a châkawm hle.

Chawhnu dar 2:30-ah Aizawl FC leh Electric Veng FC te an inkhel dawn. I League club AFC hian I Day Football-ah khan awlsam takin 3-0 in an hneh a, Electric Veng hian team pahnih inthlauhzia hriaa point khat hmuh tuma tlarhnung an hnawh phui chuan result dang daih hmuh theih a ni.

August 26, Inrinni chhun dar 12:00-ah FC Venghnuai leh Chanmari FC te an inkhel ang. I Day Football-a an inkhelh ṭumin Venghnuai hian 2-0 in hma hruai mah se a tawpah Chanmari 3-2 in an chak ta zawk. Venghnuai hian coach an thlak a, result a danglam phah dawn em, tih chu hunin a hril ang.

Chawhnu dar 2:30-ah round 1-a inkhel hmuhnawm ber tur khelh a ni dawn. I Day Football champion Chhinga Veng leh Mizoram Police ten an khel ang. Ni 21 liam taa team pahnih an inhmachhawn ṭum khan goal kua ngawt a lut a, Chhinga Veng 5-4 in an vannei. Champion rinkai ni pha ve ve an ni a, Police-in vanduai nawn an tum dawn lo - team ṭha zawk a hriat thuai dawn e.