Alcaraz hnehin Djokovic a champion

Novak Djokovic chuan a kum tam deuh tawh mah se a la ṭha tawk a ni tih a takin a lantir leh ta. Serbian star hian nimin zing khan Carlos Alcaraz hnehin Cincinnati Open nomawi a chawi a, a tan inkhel chhinchhiah tlak a ni ngei ang.

US Open inbuatsaihna a ni a, grand slam dawta ngaihhlut 1000 Masters a nih bawk avangin ngaihven a hlawh. World number 1 Alcaraz lakah Djokovic hi darkar thum leh minute 49 chhungin 5-7, 7-6 (9-7), 7-6 (7-4) in a chak.

Grand Slam vawi 23 champion tawh Djokovic hian set khatna a hloh a, set hnihnaah pawh bul ṭan ṭha loin service a hloh hmasa. Mahse, inkhel boruak sangah a zam lo, a khingpuiin championship point a hmuh tawh pawh a pawtthla leh hial a ni.

Djokovic-a'n Masters 1000 title 39 lain record nei ṭha a nihna a sawhnghet zel a, world ranking lamah erawh Alcaraz a la pha rih lo. US Open khelh ṭan huna player pahnih ranking point inthlauhna chu 20 chauh a ni ang!

Nadal ang mai

Major tournament hi best of five hmangin chak zawk an zawng ṭhin, tournament dangah erawh set thum hmangin a chak tur an chingfel ṭhin thung. 1000 Masters an khelh ṭan chin, kum 1990 aṭanga chhutin tun ṭum hi match rei ber ṭum a ni hial.

Kum 36 mi Djokovic chuan, "Tennis ka khel hnem ve tawh viau a, tun ṭuma match hautak leh nuam ang hi chu ka la khel tam lo khawp mai. Point khat lek hmu tur pawh khan kan inbei ngar ngar zel.

"Service aṭanga ball hnuhnung ber thleng khan fimkhur a ngai êm êm a ni," a ti a, kum 2021 daih tawha Rafael Nadal nen Australian Open match hautak tak an lo khelh tawh nen a inang deuha a hriat thu a sawi bawk.

Serbian star hian major title 23 a nei tawh a, tun hma lama record inṭawm a neihpui Nadal a kalsan tawh. Nadal-a ang bawka Spanish mi Alcaraz nen an inel chho leh mek; Wimbledon final-a a ngam loh lakah hnehna a chang let ve leh ta chiah.

Djokovic chuan, "Set thum kan khelh chhung khan darkar li deuhthaw a ni, hetiang ang inelna hautak min neih puitu Alcaraz kha ka fak. Kum 20 mi chauh a la ni chung khan a puitling tawh êm êm a, boruak sang pawh a ngam ka ti hle," tiin a sawi.

Match hautak

Tun season atana Grand Slam hnuhnung ber US Open chu August 28 aṭangin an khel dawn, tun hi an inbuatsaihna tournament hnuhnung a ni tawh ang. Player ṭha pahnih bawk hi New York khawpuiah pawh an inel leh ang.

Chak lo mah se Alcaraz chuan a khelh dana a lungawi thu sawiin, "Ball hnuhnung ber thleng khan beiseina ka la nei a, player ṭha tak laka ka khelh dan khan min tilawm hle. Player ropui berte zinga mi ka hneh leh teuh hle a ni," tiin a sawi.

Grand Slam vawi hnih champion tawh Alcaraz hian theihna sang tak a nei a, a rualpui player dangte aiin a rilru a huaisen bawk. Djokovic nen vawi li an intawn tawhah ṭum hnih ve ve hnehna an chang thei a, an la inbei chhunzawm dawn.

Kum 20 mi Alcaraz chuan, "Ka service leh volley te kha a fuh ṭha viau chuan ka hria a, mahse a rawn vaw let thei zel si. Coach khan net bul hnaia kal tam turin min rawn au a, a thu zawm tumin net ka pan nasa hle.

"Mahse, inkhel kha a hautak êm êm a, set thum chauh ni mah se thapui hman ngar ngar a ngaih avangin a tawpah kha chuan ka chau. Tennis ka khelh tawh chinah chuan match hautak berte zinga mi a ni," tiin a sawi.