India ramah Wenger lo kal dawn

Ropui taka Arsenal lo enkawl tawhtu Arsene Wenger chu India ramah a lo kal dawn. All India Football Federation (AIFF) president Kalyan Chaubey chuan Wenger hi October thlaah an mikhual ngei a beisei thu a sawi.

Tun dinhmunah Wenger hi FIFA hnuaia Chief of Global Football Development a ni a, khawvel hmun hrang hranga football hmasawn theih nana hma latu leh an hotupa a ni a, kar hmasa khan Sydney-ah AIFF hruaitute nen an inkawm.

AIFF president Chaubey chuan, "India rama football kalhmang siamṭhat dan tur hrang hrang kan sawi ho. A hmasa berah chuan eng vangin nge hma kan sawn chak loh tih kan sawi a, taksa chak tawk lo nge ni a, boruak leh football inmil tawk lo nge ni dawn a, chak duhna rilru kan pu tawk lo tihte kan sawi.

"Tunlai thiamna hmanga hmasawn theih dan tur kawng kan ngaihtuah bawk a, kan thil tum tak a hlawhtlin theihna turin hmalak dan tur hrang hrang pawh kan ruahman bawk. Arsene Wenger chu October thlaah kan mikhual ang," tiin a sawi.

Wenger leh a team te chuan AIFF hruaitute hi football a hmasawn tur chuan a bul ṭhut a fuh a ngai tih an hrilh a, kum 12 vel an nih lai aṭangin coaching ṭha tak an dawn a ngaih thu te, chumi atan chuan coach leh hnathawktu ṭha an pawimawimawh hmasa tih an hrilh.

Khawvela football thuneitu sang FIFA leh AIFF ṭangkawp hian hmalakna hmasa atan Under 13 central academy an buatsaih dawn a, hei hi mipa tan chauh ni loin hmeichhe tan pawh a ni dawn.

India goalkeeper hlui Chaubey chuan, "Kan rama Arsene a lo kal chuan Indian football tan thil pawimawh tak a ni ang. FIFA hminga thil kan tih chuan mipuiin an ngaihven zual dawn, hemi atan hian sorkar thuneitu lam puihna pawh kan mamawh," a ti.

Kum 73 mi Wenger hian Arsenal chu Premier League nomawi vawi thum a chawipui a, hneh loh nei loa champion thei awmchhun a ni. Team enkawl hna thawk tawh lo mah se, football kalhmang hria leh thluak ṭha a nih avangin FIFA pawhin an hmang ṭangkai hle.