Hammers-in sum ngah Chelsea an tudawl!
American sumdawng hausa Todd Boehly leh a thawhpuiten season hmasa ṭan dawnah Chelsea an lei a, player lei nan ringawt pound maktaduai 900 chuang an seng tawh - an duh ber hlawhtlinna erawh an la lei thei lo.
Tun season pawh coach thar Mauricio Pochettino hoin beiseina sang tak nen season bul an ṭan a, mahse, Stamford Bridge-a Liverpool an inhnehtawkpui hnuin khualmualah Blues an tlawm nghal!
Pathianni zan khan Chelsea hian West Ham an lenchilh a, David Moyes-a naute hian 3-1 in an chalah chil an lo hnawmsak - tlawm chungin Chelsea an haw a, league match hmasa pahnih aṭanga an point neih zat chu point khat a ni.
Hammers tana Nayef Aguerd goal hmahruai khung chu Blues hian Carney Chukwuemeka hmangin chhanglet mah se, Michail Antonio leh Lucas Paqueta (penalty) ten Hammers tan an khung ve leh a, a tawpah 3-1 in West Ham an chak.
Beiseina thamral
West Ham-in Premier League an match hmasa berah Bournemouth chu 1-1 in an inhnehtawkpui a, team ṭha leh sum hmang hnem Chelsea lakah chak tura beisei an ni lo. Mahse, Hammers hian ngaihdan dang an nei.
Minute sarihna lekah an player thar James Ward-Prowse chuan ṭha zetin corner a pet a, Aguerd chuan Chelsea barakhaihin goal hmahruai khung nan a hmang - London Stadium thawm chu ring tak a ni.
Mahse, Chelsea-in kut ruaka haw an duh bik lo a, nuihzabur maia chan an duh lo. Kum 19 mi Chukwuemeka chuan Chelsea player langsar ni turin theihna a nei tih a pholang a, Hammers defender rual ven karah mawi zetin si phurh a sut.
Chelsea an phur sawt a, minute 43-naah Raheem Sterling chu Tomas Soucek-a'n a tihtluk avangin penalty an hlawh chhuak zui. Mahse, Blues-in an hun ṭha neih an chhawr lo a, £107mtd man Enzo Fernandez chuan penalty hi a hlah!
A tawpah Hammers
Chelsea-in 2-1 a hmahruai theihna an bawhpelh a, 1-1 in chawlhlawk hman a ni. Mahse, Poch-a'n thu ṭha a sawi lo em ni? Second half ṭan aṭanga minute 53-naah Antonio kan hmu a, chiang zetin Hammers hmahruaina goal a khung.
Blues-in goal an chhuah hnuah an tan chanchin ṭha a thleng nawn a, West Ham tana goal hmahruai khungtu Aguerd chu minute 67-naah a yellow card pahnihna a hmuh avangin hnawhchhuah a ni.
Chelsea fan-ten a tam zawka khelh an nih avangin beiseina thar an nei a, mahse, an beiseina hi a thlawn mai a ni - hun pek belhah West Ham zawkin penalty an hlawh chhuak a, Paquetá chuan chak nemnghehna goal ni turin a khung.
Poch-a naute tan goal hnih sut turin hun a awm tawh lo a, khualmualah an tlawm - Chelsea vanneihna erawh an match khelh leh turah kai thar Luton Town an mikhual dawn a, insiamṭhatna hun an la nei.
Rice aiah Ward-Prowse
West Ham hian season hmasa khan kum 1980 hnua a vawi khat nan champion nomawi an chawi a, Europa Conference League-ah an champion - Pathianni zan inkhel hi he nomawi an chawi hnua mahni muala an inlan leh hmasak ber a ni.
Conference League nomawi hi fan-te hmuh turin an chhawp chhuak a, mahse, an champion theih nana tha thawhtu pawimawh Declan Rice a awm tawh lo - a hmun ruak luah tura Southampton aṭanga £30mtd-a an lakluh Ward-Prowse-a'n a hmun ruak erawh a hnawh khat hneh hle.
Aguerd-a goal hmahruai luh nana a corner pet a ṭha takzet a, Antonio khung tur a siamsak lah player ṭha bik ke aṭanga chhuak awm renga mawi a ni. Saints captain hlui Ward-Prowse chuan, "Ka tan chuan bul ṭan dan duhthusam a ni a, direct freekick aṭangin ka pet goal lo tih mai chauh a ni," a ti!
Freekick specialist Ward-Prowse chuan sawi zawmin, "Rice-a'n he club tana a hnathawh chu kan hre vek a, James Ward-Prowse-a'n he club tana a tih theih hi ka pholan ve a ṭul a, chu chu ka rilru puthmang pawh a ni. Ni duhawm bik a ni a, hetiang hun hi kan tawn zel ka beisei," a ti a, beiseina a nei sang.
A thlawn mai maw!
Chelsea tan player man to Enzo-a'n penalty a khung lo a, a aia man to zawk Moises Caicedo chuan penalty a chawi bawk - Ecuador midfielder hian £100mtd-in Chelsea hi a zawm a, a man hi a khelh ṭhat dan a zira £115mtd thlenga sang chho thei tur a ni.
Mahse, Pathianni zana a khelh dan en hi chuan Blues hi a manah an insen belh a rinawm lo - minute 61-naa bench aṭanga lut Caicedo hian 2-2 ni tura si phurh sutna remchang a neih a chhawr lo a, hun tawp dawna Paqueta chhuih luh penalty chu a chawi a ni bawk!
Liverpool aia Chelsea thlangtu Caicedo hian holam takin Pablo Fornals lakah ball a hloh bawk a, Brighton & Hove Albion tana a khelhpui ṭhin goalkeeper Robert Sanchez chuan chhanin, heta ṭanga ball kal zel chu ṭha takin a dang.
Liverpool nen an inkhelh ṭumin Chelsea-in Caicedo an mamawh chhan a lang a, mahse, Caicedo an neih hnuah an buaina chinfel a ni lo a ni mai lo a, belhchhahin a awm - Poch-a tan ngaihtuahna sen ṭhat a ṭul dawn.
