Barcelona an chak ve ta

Spanish La Liga champion lai Barcelona-in tun season-a an league match hmasa berah hnehna an chang zo lo a, Pathianni zanah erawh thawnthu a danglam ta - an mikhual Cadiz chu 2-0 in an hneh.

Barcelona hian an stadium hmingthang Nou Camp chu an sak ṭhat mek avangin tun season-ah an mualah an khel thei lo a, Pathianni zan inkhel pawh hi Barca tan 'home match' ni mah se, Barcelona khawpuia Olympic Stadium-ah an khel.

Barca hian an match hmasa zawkah Getafe chu 0-0 in an inhnehtawkpui tawh a, Cadiz lakah pawh hian an chak zo lo leh dawn niin a lang hman. Mahse, a hunah tak goal an khung a, minute 82-naah Pedri chuan goal hmahruai a khung.

Pedri goal khung hi Manchester City captain hlui Ilkay Gundogan siamsak a ni a, treble champion team kalsana Catalan club pantu midfielder ball pek a ṭha takzet.

Barcelona-in minute 82-naah goal khung chauh mah se, goal dang khung turin hun an la nei tho a, Ferran Torres chuan hun pek belh minute linaah theihna a nei sang tih pholangin an goal hnihna a khung.

Spanish champion tan Robert Lewandowski chuan minute 90 khel tluan mah se, match hmasa ang thoin goal a khung lo leh ta a, kum 35 tling ve tawh striker hian goal khung loa hun hman reng a duh dawn lo - Torres goal khung erawh a siamsak a ni.

Barcelona-in hnehna an chan zanah chanchin lawmawm dang an nei a, chu chu Lamine Yamal-a'n inkhel bul a ṭan kha a ni. Barcelona academy aṭanga inzir chhuak Yamal hian kum 16 leh ni 38 mi niin, Barcelona tana league match-a bul ṭan thei naupang ber record a siam.