Stones a la chawl rih dawn

Manchester City defender John Stones chu international break hmain a inlan hman dawn lo. Kum 29 mi Stones hi pre season-ah a malpui a tihliam a, Premier League match hmasa pahnih bakah UEFA Super Cup-ah a inlan lo.

International break hi September 4-12, 2023 chhung hian neih tur a ni a, hemi zawh hian a inlan theih a rinawm. Man City-in Sheffield United (Aug 27) leh Fulham (Sept 2) te an hmachhawn dawn a, a inlan thei lo ve ve ang.

England-in Euro qualifier-a Ukraine an hmachhawn turah leh friendly match-a Scotland an khelh hunah a khel thei dawn lo. International break zawh hian City-in West Ham an tlawh dawn a, hetah hian a khelh theih a beiseiawm.

Premier League champion lai Man City hian midfielder pawimawh Kevin de Bruyne chu hliam vangin an chhawr thei lo a, Belgian midfielder hi thla li chhung a chawl dawn. City hi Rennes winger Jeremy Doku nen sawizawm an ni.