Champion lai Bagnaia chungnung

MotoGP world champion ni lai Francesco Bagnaia chuan Austrian GP-ah hnehna a chang a, season chawhnu lam intlansiak an thar thawhlehna hmasaah a chak avang hian championship lamah pawh a dinhmun a sawhnghet.

Pathianni tlai Red Bull Ring-a intlansiakah Bagnaia hian harsatna lian tham a tawk lo - Inrinni khan spint race lamah hnehna a lo chang tawh bawk, tun season chhungin spint race leh intlansiakah ṭum thum chu hnehna a chang kawp tawh.

Ducati rider Bagnaia chuan, "Season tir lam ai khan ka tlan chak zawkin ka hria, mahse keimah chauh ni loin midang zawng zawng tan pawh intlansiak a hautak vek. Chumi kara hnehna chan theih chu a lawmawm.

"Intlansiak tir lamah khan ka bike ke hma lama tyre kan vuah kha a fuh tawk lo deuh dawn emaw ka ti hman a, mahse vawi thum kan tlan kual kha chuan ka thunun thiam tawh hle a ni," tiin a sawi.

Italian tlangval Bagnaia hnungah hian Brad Binder leh Marco Bezzecchi te an thleng a, rider championship lama Bagnaia hnaih bertu Jorge Martin erawh pasarihnaah a thleng hram a, an inkar a tizim thei ta lo.

Austrian GP bika pahnihna dinhmun luahtu Binder chuan, "Ka theihna leh thiamna zawng zawng ka hmang, a hmasa bera thleng turin hun remchang pawh ka hmu ve zauh a, mahse tun ṭum atan chuan Bagnaia kha midang tana tluk theih a ni lo," a ti.

Styria tlang chheh vela intlansiak hi mipuiin an hlut a, a hmunah mi 94,000 chuangin an en. A tir aṭangin Bagnaia a tlan fuh êm êm a, season kal laia a vawi nga nana a chak hi a mak hran lo, a zawna world champion ni turin a dinhmun pawh a sawhnghet ta hle.

Bike intlansiakna sang ber hi season chawhma lam an zawh hnuah, season chawhnu lam an ṭan chho leh mek a ni. September 3, Pathianni hian Circuit de Barcelona-Catalunya tlankawngah Bracelona Grand Prix an tlan leh ang.