Club leh player lam an thiam lo ve ve - Poch

Chelsea manager Mauricio Pochettino game plan-a Romelu Lukaku a awm lo chungin Belgian striker hi London club-ah a la awm. Argentine manager Poch chuan club leh player lam an thiam loh ve ve thu a sawi.

Belgium international Lukaku hian kum hnih liam ta khan Inter Milan aṭangin Chelsea hi pound maktaduai 97.5-in a zawm a, May 2022 hnuah Blues tan a la khel leh lo.

Season liam ta khan Lukaku hi Inter Milan-ah loan hmangin a kir a, kuminah erawh London club hian a ngheta a chhuak dawn a nih loh chuan Lukaku hi chhuahtir an phal lo.

Pochettino chuan, "Club leh player thiam loh a ni. Club chauh thiam loh a ni thei lo. Tun dinhmun a thlen chhan hi club leh player thutlukna vang a ni. Player lut leh chhuak an awm reng rengin club leh player-in thutlukna an siam a ngai," tiin Chelsea thiam loh chauh a nih loh thu a sawi.

Lukaku hian kum 18 a nih laiin kum 2011 khan Chelsea hi a zawm a, Blues-a a awm hmasak hian vawi khat mah a inlan lo. West Brom, Everton, Manchester United leh Inter tana a khelh hnuin kum 2021 khan Stamford Bridge-ah hian British record fee-in a kir.

Tun nipui bazarah khan Juventus nen sawizawm a ni a, Old Lady ṭantuten an duh lohna uar taka an lantir avangin Lukaku-a'n Turin club hi a zawm ta lo.